Shillong, Nailar 12
Kum shi bynta ban pynthikna ïa ka jingïaid beit bad long shngaiñ ha ka sngi ba rakhe ïa ka sngi Laitluid ne ka ‘Independence Day’ ka Ri, ki shipai ïada khappud ki Border Security Force (BSF) Meghalaya kila sdang pyntreikam da ka “Operation Alert” ha shilynter jong ka khappud Indo-Bangladesh hapoh ka jylla Meghalaya naduh ka 10 tarik haduh ka 16 tarik mynta u bnai.
Ïakane ka jingpahara kaba kyrpang la ïatreilang hapdeng ki shipai BSF bad ki pulit ka jylla bad kiwei ki bor pahara. Na ka liang jong ki BSF kila kham pynbun shuh shuh ïa ki shipai ban pahara ha ki bynta ba kham shakhmat jong ka khappud bad ki heh shipai BSF na ki jaka bapher bapher kila hiar sha khappud ban peit ïaka jingpyntreikam.
Kane ka jingpyntrei kam jong ki shipai BSF ka long ban pynkhlaiñ ïa ka jingpahara ïa ki jaka, da kaba pynlong ka jingpahara baroh shi sngi bad ruh da kaba pynap ne buh ïa ki jaka talasi (naka check) kumjuh ruh ha ki jaka wah ban khanglad ïa ki briew ha khappud.
Ha kane ka jingpyntreikam ïa ka ‘operation alerts’ la pynleit jingmut ruh ban peit ha kaba ïadei bad ki kam khaïi tuh ïa ki masi ha khappud bad kumjuh ruh wat ïa ki mar ki mata kiba la shah bad ruh ka jingleit bad jingwan beaiñ ha khappud.
Ki jaka ba ki shipai BSF kila pynleit jingmut bha mynta ki long ha kaba ïadei bad ki lynti bad kumjuh ruh ha ki bynta ba don ki wah ha shilynter jong ka khappud, mynta kila don hapdeng ka jingpeitngor kaba jur bha.
Na ka liang jong u IG FTR HQ BSF Shillong u OP Upadhyay uba don mynta ha khappud u la ong, ka “Operation Alert” ka pyni ïa ka jingshimkhia jong ki shipai BSF ban ïada na ka bynta ka jingshngaiñ jong ka ri ha kum kane ka por ba don ka jinglehkmen bad khanglad ba kan ym don kano kano ka jingshah pynthut. Kane ka jingtreikam kan dang neh tad haduh ka 16 tarik u Nailar, bad ka jingpahara ba khlaiñ ha kylleng ki jaka jong baroh ka Meghalaya kan ïai bteng.
