Shillong, Nailar 12
Ka nongbah Shillong ha ka Sngi Ba-ar ka la shim ïa ka sienjam ban ïaid sha ka bynta ka ban neh ban sah bad ka ban pynsuk haba phai sha ka leit ka wan ha ki jaka sor da kaba pyllait paidbah ïa ka ‘Ride Shillong’ – ka rukom ban pyndonkam paidbah ïa ka saikil kaba treikam da ka bording ilektrik ne ‘Electric Bicycle’ ban kyntiew ïa ka leit ka wan kaba ïahap bad ka mariang, ban pynduna ïa ka jingdheng kali, bad ban pynshlur ïa ka rukom im kaba koit ba khiah.
Ha kane ka jingïalang la wan ïashim bynta da u Myntri Rangbah ka Jylla, u Conrad K. Sangma, u tyngshop ba paw ka ri, u Milind Soman, lem bad ki heh ophisar Sorkar, bad ki nongñiah saikil na kylleng ka nongbah.
Kane ka sienjam ka long kum shi bynta jong ka jingthmu ka Sorkar Jylla na bynta ka nongbah Shillong kaba ïadei bad ki nongïaid kjat bad ki nongñiah saikil, ba la pyntreikam ha ryngkat ka jingkyrshan jong ka tnad kam shna ïing bad kam pynroi sor ka Sorkar Pdeng, ka GIZ (India-Germany cooperation), tnad kam jngoh kai pyrthei ka Jylla bad ka Green Urban Mobility Partnership.
Ha ka jingkren jong u, u Myntri Rangbah u la pynpaw ïa ka jingsngew sarong ban sdang ïa kane ka projek kaba pynïabiang hapdeng ka jingpynneh-pynsah mariang bad ka jingsuk jong ka juk mynta.
“Mynta ka sngi ka long kham palat ban ïa ka jingpyllait ïa ka rukom bathymmai ha ka leit ka wan-ka dei ka jingsdang jong ka jingkylla ha ka rukom pyrkhat jong ngi shaphang ka ïaid ka ïeng, ka leit ka wan ha nongbah jong ngi,” u la ong.
“Ka jinglong-jingman ka jaka jong ka Shillong ka ju buh jingeh haba phai sha ka jingñiah saikil ha ki por mynshuwa, hynrei da ki saikil ilektrik, ngin weng noh ïa kata ka jingeh. Kane ym tang ba kan pynshlur shuh ïa ki briew ban phai khmat sha ka jingñiah saikil hynrei kan pynduna ruh ïa ka jingpynmih tdem bad ban pynjai-jai ïa ka ïaid ka ïeng ki kali ha nongbah jong ngi,” u la ong.
U la bynrap, “Ka leit ka wan kaba neh ba sah kam dei ka spah ka phew-ka dei ka jingdonkam. Da ka ‘Ride Shillong’, ngi ai ïa ki briew jong ngi ïa ka lad kaba kham khuid, kaba koit ba khiah ban ïaid kylleng ka nongbah katba ngi pyni ruh ïa ka jingaiti jong ngi ha ka jingïakhun pyrshah ïa ka jingkylla suiñbneng. Nga pynshlur ïa baroh-ki samla pule, ki ‘riew shemphang bad ki nongjngohkai pyrthei-ban pynlong ïa ka jingñiah saikil kum ka bynta jong ka jingim ba man ka sngi. Ryngkat lang, ngi lah ban tei ïa ka Shillong ha kaba ki surok kin kham duna ka jingkhapngiah, ka lyer kan kham khuid, bad ka imlang-sahlang jong ngi kan koit kan khiah.”
Na ka liang u Commissioner & Secretary ka tnad kam pynroi sor, u Dr. Vijay Kumar u la ong, “Ngi dang shna pynthymmai ïa ki surok, pynheh ïa ki lynti ïaid kjat bad wanrah ïa ki lynti ïaid saikil. Kane ka dei ka rukom treikam kaba kyllum lang na ka bynta ka leit ka wan ha sor, bad ka ‘Ride Shillong’ ka dei ka bynta kaba kongsan jong kane,” u la ong.
Kumjuh, u ‘riew sumar met uba kitkhia ïa ka koit ka khiah, ha kajuh ka por, u ‘riew ieid mariang, u Milind Soman haba kren ha ka jingïalang, u la ïaroh ïa ka jinglah jong kane ka sienjam ban ai mynsiem na bynta ka jingim kaba koit ba khiah.
“Ka jingñiah saikil ym tang ba ka bha na bynta ka pyrthei-ka long kaba wanrah jingkylla ha ka bha ka miat ba shimet jong phi. Ka Shillong ka pyni ïa ka ri India baroh kawei kumno ban ïalam da ka nuksa,” u la ong.
