Shillong, Nailar 12
U Principal Secretary ka tnad ka koit ka khiah, u Sampath Kumar ha ka Sngi Ba-ar u la ong ba ka Sorkar ka dang khmih bniah haba ïadei bad ka jingkyrpad jong ka University of Science and Technology, Meghalaya (USTM) na bynta ka jingai ram kaba khlem sut, kaba T. 200 klur na bynta ban tei ïa ki jingtei jong ka PA Sangma International Medical College & Hospital (PIMC).
“Ka Sorkar ka dang khmih bniah ïa ka jingkyrpad (jong ka USTM),” ong u Kumar haba ïakren bad ki nongthoh khubor haba kdew ba kane ka shlem pule ka la bei tyngka ha ka Jylla bad pynbiang ïa ka jingsumar ha ka dor kaba duna sha ki paidbah ka Meghalaya.
Hynrei, u la ong ba ïa kane ka kam la peit da kiwei pat ki tnad treikam.
U Kumar u la pyntip ba kane ka Medical College ka treikam bad ka jingbhah ïa ki jaka (seat) na ka bynta une u snem la pyndep lut.
“Kumba 40 tylli ki jaka (seat) la mang sha ki kyrtong jong ka Jylla, bad ïa ka jingïasyllok la pynlong da ka Directorate of Health Services (DHS),” u la ong.
