Shillong Nailar 12
Ka Khasi Student Union (KSU) South West Khasi Hills District ha ka 12 tarik u Nailar 2025 ka la leit ban ïakynduh ïa u Chief Executive Member ka Khasi Hills Autonomous District Council (KHADC) ban pynpaw ïa ka jingpyrshah halor ka jingthmu u Syiem ka Hima Maharam ban ai jaka sha ki Shipai.
Haba kren sha ki lad pathai khubor u President ka KSU Ranikor Circle u Bah Markoni Thongni ula ong ba ka jaka ba thmu ai u Syiem sha ki shipai kadei ka jaka ba don hajan ka wah Photmula kaba dei ka jaka ba ju rep ju riang da kiba bun ki khun ki hajar jong ka Hima Maharam.
“Ka seng kala pynpaw ïa ka jingpyrshah jur ïa kane ka jingleh sop sop u Syiem ka Hima ban ai ia katei ka jaka bala rep da ki khun ki hajar sha ki shipai” ula ong.
Ula ïathuh ruh ba na ka liang ka seng ka la dawa na u Syiem ka Hima ba u dei ban pynsangeh noh mardor ïa kane ka jingthmu bad lada um sangeh ka seng kan sa shim da ki sienjam ba tyngeh.
Haba kylli ula ong “Kane ka jingthmu ai jaka ka Hima na ka liang ki paidbah kim don jigntip eiei hynrei la shu leh sop sop da ka Hima bad ka seng ruh ka shu ïoh jingtip na ka jingdon kiba ïathuh”.
Nalorkata, ula ïathuh ba na ka liang u CEM u la kular ban shimkhia ïa kane ka kam bad lada ka don kano kano ka jingphah jingthoh na ka Hima sha ka District Council, ka District Council kan sa pynsangeh noh shwa ïa kane ka jingthmu ka Hima Maharam.
