Shillong, Nailar 12
U Myntri Rangbah ka Jylla, u Conrad K. Sangma u la ïakynduh ïa u Myntri ka tnad ka koit ka khiah ka Sorkar Pdeng, u J.P. Nadda ban kyrpad ïa ka jingmynjur na ka National Medical Commission (NMC) haba ïadei bad ka Shillong Medical College (SMC).
Ka jingwan jurip na ka liang ka NMC ka la dep ban urlong, bad ka kolej ka dang ïaleh ban weng ïa ki jingeh ha ka ban wanrah ïa ka kynhun nonghikai kaba pura.
Katkum ka jingong u Principal Secretary ka tnad ka koit ka khiah, u Sampath Kumar, ka kam ba ïadei bad ka jingthung ïa ki nonghikai ka la jan dep, ha kaba kumba 90% na ki nonghikai ba donkam na bynta 50 tylli ka jingdon jaka (seat), la dep ban pynbiang.
Ka kolej ïa mynta ka la ïaid shakhmat ban thung ïa ki ‘Assistant Professor’ kiba napoh ka Jylla, katba ïa ki kam kiba ha ka kyrdan ‘Professor’ la pyndap lyngba ka rukom treikam kaba kyrpang, ong u Kumar haba kren sha ki nongthoh khubor ha ka Sngi Ba-ar.
U Kumar u la pynpaw ruh ba kawei na ki jingeh kaba kongsan ka dei ka jingduna ki nonghikai – ka mat ka bym dei tang na bynta ka Shillong Medical College, namarba ka Tura Medical College ha Ri-lum Garo ruh ka mad ïa kijuh ki jingeh.
Ka jingwanrah ïa ka kynhun nonghikai ba pura la khmih lynti ba kan kham shim por – lehse haduh 10-15 snem, namar ki ophisar ka koit ka khiah ki bteng ïa ki jingpule ‘Post Graduate’ ban ïoh ïa ka jingshemphang.
Haba kylli, u Kumar u la ong ba ka kolej ka dang ap ïa ka jingmynjur ban ïaid shakhmat bad ka kam ban thung ïa ki nonghikai kiba dang sah.
“…Na ka bynta ka jingdon 50 tylli ki jaka (seat), ngi la ïoh haduh 90% ki nonghikai kiba donkam. Na ka bynta ki nonghikai kiba dang sah, ka jingtreikam ka dang ïaid shakhmat,” u la bynrap.
