Aizawl, Nailar:
Ki pulit ka jylla Mizoram ki la pynlong ïa ki jingleit kurup drok sha kylleng ki jaka, ha kaba ki la ïoh ban kurup bun bha u drok tang ha ki ar taïew. Ki jingïoh kurup drok ki la long ha ryngkat ka jingïatreilang ki kynhun CID, CRPF, bad ki kynhun Assam Rifles.
Ka jingïoh kurup ïa u drok ka la lot sha ka T. 302 klur, ha kaba la kurup da ki pulit ka Mizoram ha ki jingïatreilang ha kylleng ka jylla ha kine ki ar taïew ba la dep.
Ha ka jingpynbna khubor, u Inspector General of Police (Headquarters) bad u Chief Public Relations Officer jong ka Mizoram u H Ramthlengliana u la ong, “Ka jingpyntreikam jong ngi kaba khlem sangeh bad kiwei pat ki jingïakhun pyrshah ïa ki kam beaiñ ka dang ïai bteng. Ki jingkurup kiba kongsan ïa ki mar ba la khang pyrshah dang shen la leh da ki pulit jong ka Mizoram ha ki katto katne ki jaka.”
Ka jingkhynra lang ha ka 9 tarik u Nailar da ki pulit Special Narcotics Police Station hapoh ka CID Crime bad ki pulit 225 Battalion CRPF ha Aizawl ka la pynlong ïa kawei ka kali ban bat ïa kawei ka kali ha ki thaiñ Seling bad Bungbangla. Ki bor pynïaid ki la ïoh kurup haduh 3.930 kilo ki dawai kuli Methamphetamine, kiba la antad ba ki kot sha ka T. 51.09 lak.
Ha kine ki jingleit khynra, la kem ïa lai ngut ki briew ïa kiba la tip kyrteng kum u Sahab Uddin (41), u Emanuel Remnalalliana (25), bad u Lalbiaksiama (23). Ka la don ka jingbuh jingujor hapoh ka kyndon 22(c), 25, bad 29(1) jong ka NDPS Act.
Shwa ïa kane, ha ka 6 tarik Nailar, ki pulit ka Champhai ki la ïoh ban kurup 1.053 kilo (88 song sabon) na kawei ka kali ha Khankawn Checkgate kaba la suba ba dei u drok Heroin uba shongdor T.31.59 lak.
Ka Agnes Lalremsiami (32) ka la shah kem ha kaba ïadei bad kane ka mukotduma ba la mudui hapoh ka kyndon 21(c) jong ka NDPS Act.
Kawei na ki jingïoh kurup kaba heh tam ka la jia ha ka 1tarik Nailar, ha kaba ka kynhun ba la ïatreilang jong ka CID Special Branch bad ka Special Narcotics PS ki la bat ïa kawei ka kali pickup ha ka lynti ïaid na Zemabawk sha Seling.
Ki ophisar ki la lap ïa kawei ka jaka ba buhrieh kaba don 20.304 kilo u drok ba la suba ba u dei u Crystal Methamphetamine uba shongdor kumba T. 300 klur, ryngkat bad 1.625 kilo (120 tylli ki song sabon) u drok heroin uba shongdor haduh T. 49.56 lak.
Uwei u nongñiah kali ïa uba la tip kyrteng kum u B Lalthazuala (45) u la shahkem, bad ka jingtohkit kaba hadien ka la pynlong ban ïohkem ïa u suba uba la tip kyrteng kum u Bawilianthang (42).
Ïa kane ka mukotduma la mudui hapoh ki kyndon 21(c), 22(c), bad 25 jong ka NDPS Act.
Ha kawei pat ka jingkhynra ha ka miet jong ka 1 tarik Nailar, ki pulit ka Lunglei bad ki shipai 20th Battalion Assam Rifles ki la ïoh ban kurup haduh 220.81 grams (18 tylli ki synduk sabon) jong u heroin uba shongdor haduh T. 6.62 lak na uwei u nongleit jingleit uba la tip kyrteng kum u Lalrintluangi (33) uba shong ha kawei ka kali Lungb- Chahicle kaba na Lungb-haicle.
La ïoh kurup shuh shuh ïa u drok heroin uba khia haduh 120.31 grams (10 tylli ki song sabon), uba shongdor T.3.61 lak, na ki lai ngut kiwei pat kiba shong ha kajuh ka kali.
Ha ka 31 tarik, Naitung, ki pulit ka Champhai ha Khankawn Checkgate ki la ïoh ban kurup 167 gram (16 tylli ki synduk sabon) u ba dei u drok heroin uba shong dor T.5.01 lak na u Lalmuanawma (38 snem) bad u K. Lalawmpuia (27 snem).
Ha kawei ka jingjia ba kyrpang, ha katei kajuh ka sngi, la ïoh ban kurup 364 gram (31 tylli ki synduk sabon) u drok heroin ba shongdor T.10.92 lak na ki lai ngut ki briew kiba sah ha Aizawl.
Ka jingïatreilang ha ka 28 tarik, Naitung, da ki Pulit jong ka Champhai bad ka CID Special Branch ka la pynlong ban kurup ïa u drok Heroin uba 440 grams (ha ki 36 tylli ki song sabon) uba shongdor T.13.20 lak na u Kalpo Jyoti Borah (26) na Assam bad u Rajan Brahma (32) na Arunachal Pradesh.
