Shillong, Nailar 12
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor kaba la ïoh na ki pulit la ong ba u Dipen Borah u la ai ka jingujor ba ha ka 9 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-5302 na ka jaka sah ka jong u, kaba don ha Mawpun, Shillong.
Katba na ka liang jong u Abdin Rai jong ka City Hut Dhaba, Shillong u la ai ka jingujor ba ha ka 8 tarik mynta u bnai, ki runar bym lah ban ithuh ki la tuh ïa ki waiar na ka ïing building kaba dang don hapdeng ka jingmaramot, kaba don ha Bivar Road, Shillong.
Kumjuh ruh na ka liang jong ka Moina Dutta ka la ai ka jingujor ba ha ka 8 tarik mynta u bnai, ki runar bym lah ban ithuh ki la tuh ïa ka arshaka ka jong ka, kaba don ïa u registration number ML05-Y-2400 na ka jaka pynïeng kali kaba don ha Pynthorumkhrah LP School, Shillong.
U Bappi Rabha, Cluster In-Charge jong ka Nongstoiñ Bharti Hexacom Ltd., u la ai ka jingujor ba ha ka 21 tarik jong u bnai ba la lah, u la lap ba ki runar bym lah ban ithuh, ki la tuh ïa uwei u battery bank ba kynthup haduh arphewsaw tylli ki battery cells kiba shongdor haduh kumba T.2,79,000/- na kawei ka tower ba la pynïeng ha Pyndengshallang ha shnong Maweit ha West Khasi Hills.
