Kalispell, Nailar:
Kawei ka liengsuiñ rit kaba dei ban leit hiar ha ka Kad Liengsuiñ ha Montana ha ka Sngi Nyngkong, ka la leit hap bakla ha kawei pat ka liengsuiñ kaba dang ieng ha katei ka Kad Liengsuiñ, ha kaba ka la kem ding jur bha hynrei ka long kaba donbok ba ym shym la don ba mynsaw jur na katei ka jingjia.
Katkum ka jingïathuh jong u heh pulit jong ka Kalispell u Jordan Venezio bad ka tnat pynïaid liengsuiñ jong ka sorkar pdeng, la ong ba katei ka liengsuiñ kaba don tang kawei ka kor engine, ka dang kit ia 4 ngut ki briew ha katei ka sngi bad ka dang pyrshang ban leit hiar noh ha ka por kumba 2 baje nohphai sngi ha ka kad liengsuiñ jong ka nongbah Kalispell.
Ka jingtohkit ba nyngkong ka la pyni ba u nongñiah liengsuiñ um shym lah shuh ban tehlakam ia katei ka liengsuiñ ha katei ka por bad u la pynnoh ia ka, ha ka lynti ïaid liengsuiñ shwa ba ka liengsuiñ kan tynrah ïa ki katto- katne ki liengsuiñ kiba la ieng lypa hangta, kaba la wanrah ia ka jingkemding ïa ki bun tylli ki liengsuiñ ha katei ka Kad Liengsuiñ haduh ba katei ka ding ka la ioh ban pur shaduh ki jaka phlang ba marjan bad katei ka jaka hashwa ban ioh ban pynlip noh da ki kynhun jong ka tnat pynlip ding.
Katei ka Kad Liengsuiñ kaba rit bad kaba long trai da ka nongbah ka don sha ka phang Shathie jong ka nongbah Kalispell, ka nongbah kaba don tang kumba 30,000 ngut ki paid nongshong shnong ha ka thaiñ Shatei Lam Mihngi jong ka Montana.
Ki nongsakhi ki la ïathuh ba kawei ka liengsuiñ ka la hap ha kaba kut jong ka lynti ïaid liengsuiñ bad ka la hap ha kawei pat ka liengsuiñ, ong u heh ka tnat pynlip ding jong ka Kalispell, u Jay Hagen.
La ong ba kitei kiba shong hapoh, ki la lah ban pyllait im hi da lade, da kaba mih noh wut-wut na katei ka liengsuiñ tang mar ia sangeh ha ka por ba ka la hiar ha katei ka jaka. La ong ba 2 ngut ki dei kiba la shu mynsaw tang malu – mala bad la sumar ia ki ha katei hi ka Kad Liengsuin.
Katei ka liengsuin, ka dei kaba mih na Pullman jong ka nongbah Washington, katkum ka khubor jong ka National Transportation Safety Board.
Ia kane ka liengsuiñ la ithuh da ka FAA ba ka dei ka Socata TBM 700 Turboprop. La shna ia ka ha u snem 2011 bad la dei trai da ka Meter Sky LLC jong ka Pullman, ong ki rekod jong ka FAA. Ki nongmihkhmat jong ka kompeni kim shym la jubab mardor ia ka khubor telephone kaba pan jingmut.
