Shillong, Nailar 12
Ki pulit jong ka West Garo Hills ki la kem noh ïa ki san ngut ki briew bad na kine la ïoh ruh ban kurup ïa ki pisa thok jong ka India (Fake Indian Currency) kaba la kot da ki phew hajar tyngka.
Katkum ka khubor ba la ïoh na ki pulit, la ong ba hadien ka jingïoh ka jingtip kaba bniah, ki pulit ki la rah ïa ki ar ngut ki briew kata u Tecksin D Sangma (29 snem) bad u Cherang D Sangma (23 snem) katba ki dang pyrshang ban phet da kawei ka arshaka kaba don ïa u registration number AS16-A-3296 ha ka thaiñ Nokchi ha West Garo Hills.
Ki pulit hadien ba ki la ïoh ban bat ïa kine ki ar ngut, ki la ïoh ruh ban kurup ïa ka pisa thok kaba kot haduh kumba T.15,500/- na ka met jong u Cherang D Sangma.
Shuh shuh la ong ba kham hadien, ha ka jingïalam jong ki riew shimet, ki pulit ki la rah noh sa ïa ki ar ngut ki briew kiba la tip kyrteng kum u Mikrang D Sangma bad Sengtin R Marak na ki jaka sah ki jong ki, kaba don ha ka shnong Dobokgre ha West Garo Hills bad ruh ban kurup ïa ka pisa thok kaba kot sha ka T.29,500/- na ka met ka jong ki.
La ong ruh ba ha kaba ïadei bad kane ka kam, uwei u briew ba la tip kyrteng kum u Walton D Sangma (27 snem) u la wan ban aiti noh ïa lade hakhmat jong ki pulit ka Purakhasia OP ha West Garo Hills. Ha ka por ba la pynlong ka jingtohkit, la lap ba uwei u briew bym lah ban tip kyrteng u la aiti ïa kine ki pisa thok kaba kot sha ka T.95,000/- sha u Walton D Sangma ha ka thaiñ Chapati ha ka jingïabujli bad ka pisa T.50,000/-.
Na ka liang jong ki pulit ki la kem noh ïa baroh kitei ki briew kiba la kynnoh donkti ha ka jingpynïaid ïa ka pisa thok.
