Shillong Nailar 12
Hadien ba la ïoh ka jingujor na kiba bun ki paidbah ba ki trai nongbuh petrol pump kim shem la siew ïa ki nongtrei katkum ka Minimum Wage Act 1948, ka la pynlong ïa ka Khun Hynñiewtrep National Awakening Movement (KHNAM) State Youth Wing ha ka 12 Tarik u Nailar 2025 ban leit jurip ïa ki petrol pump ha kylleng ka Sor Shillong.
Ha kane ka jingleit ban jurip ïa ki petrol pump hapoh ka jingïalam u Bah Joseph Pyngrope kum u Working President la lap ba bun ki petrol pump kim shem la pyntreikam ïa kane ka ain katkum ba la bthah da ka sorkar India bad ka sorkar Jylla.
Nalorkata, la lap ruh ba kidon kiba trei la bun bun snem ha kane ka kam hynrei ka jingsiew pat ki ïoh tang khyndiat.
Haba kren sha ki lad pathai khubor u Bah Joseph Pyngrope ula ong ba ka jingwan jurip jong ki kadei hadien ba la ïoh ka jing ujor na ki nongtrei ha ki petrol pump ba ki ju ïoh rit bha haba ïadei bad ka jingsiew.
Ula pyntip ruh ba ha ka jingjurip kiba bun hi ki petrol pump kim pyntreikam katkum ka aiñ bad kidon kiba la trei la bun bun snem hynrei ki ïoh ka jingsiew tang 6 bad 7 hajar tyngka.
“Kane ka jingsiew ka wanrah ïa shibun ki jingeh ïa ki nong bylla, ban pynbiang pyndap ïa ka ïing ka sem, kum ha ka juk ba mynta” la bynrap u Bah Joseph.
Shuh shuh ula ong ba katkum ka jingpyntip na ka tnad Labour Employment and Skill Development ka Sorkar Jylla, kata ha ka 01 tarik u Ïaïong 2025 la kdew, ba ka bai bylla sngi na ka bynta ki unskill workers la pynkiew na ka 525 sha ka 541 tyngka, ïa ki semi skill workers na 565 sha ka 583 tyngka, ïa ki skill workers na ka 605 sha ka 624 tyngka bad ïa ki highly skill pat na ka 645 sha ka 665 tyngka.
Kumta ula kyntu ïa ki trai petrol pump ba kidei ban siew ïa ka bainong sha ki nongtrei katkum ba la pynmih da ka sorkar bad lada kim kohnguh ïakata ka seng kan sa ïaid da kiwei ki lynti bad kin sa nangïai budien biang ïa kane ka kam.
