Mairang, Nailar 12
U Myntri Rangbah ka jylla, u Conrad K. Sangma ha ryngkat u Myntri ka tnat Commu-nity and Rural Develop-ment u AT Mondal bad ka Myntri ka tnat ka Koit ka Khiah ka Kong Ampareen Lyngdoh ha ka 12 tarik mynta u bnai, u la plie paidbah ïa ka Block Integrated Deve-lopment Complex jong ka Mairang C&RD Block, ryngkat bad ki jingtei thymmai ha Tirot Sing Memorial Civil Hospital, Mairang kiba kynthup ïa ka Sick Newborn Care Unit (SNCU), Paediatric Intensive Care Unit (PICU), Adult Intensive Care Unit (AICU) bad ka High Dependency Unit (HDU).
U Myntri Rangbah haba kren ha kane ka sngi u la ai khublei kyrpang ïa u Marborsing bad u la pynpaw ruh ba ha kine ki 6 bnai bala leit noh, ka Sorkar ka la sdang ïa ka rukom treikam kaba thymmai da kaba ailad ïa ki nongjop, ki nonghikai, ki rangbah balang bad ki nongïalam shnong ban plie paidbah ïa ki ïing treikam bad ki jingtei paidbah.
Shuh shuh u la kdew ruh ba ki jingtei kum kine ki dei jong ki paidbah bad ka jingïatreilang ka long ban pynkhlaiñ ïa ka jingsngew don bynta bad ka imlang sahlang.
Ha kaba ïadei bad ka koit ka khiah, u Myntri Rangbah u la ong ba kine ki jingtei thymmai ha hospital ki dei shibynta jong ka jingtreikam ka Sorkar ban pynbha ïa ka rukom sumar hapoh ka jylla baroh kawei.
U Myntri Rangbah u la pynbna ruh ba yn tei ïa ka Convention Centre ha manla ki nongbah jong ka District ban pynlong ïa ki prokram, ki jingïalang bad ka jingïalehkai jong ki khynnah skul. Ïa ka Mairang Convention Centre kaba kot T.25 klur la dep pdiang bad kan sdang shen ha kane ka Financial year.
U la ong ruh ba ka Sorkar ka la mang pisa na ka bynta ka jingtei ophis jong ka Hima Nongkhlaw ha kaba T.58 lak la mang na ka bynta ka phase ba nyngkong bad T.1.8 klur na bynta ka phase kaba ar.
Ha katei ka sngi la donlang ruh u Myntri ka tnat Sports & Youth Affairs, u Bah Shakliar Warjri, u MLA ka Mairang, u Bah Metbah Lyngdoh, ki MDC na Mairang bad Mawthadraishan, ki ophisar ka Sorkar bad ki paidbah nongshong shnong.
Na ka liang u Myntri Rangbah u la ïoh ruh ban khap ïa u Ribon bad ban plie ïa kane ka ïing treikam thymmai jong ka Block ha u samla Marborsing Marbaniang uba dei u North East Young Talent Artists Award.
