Shillong, Nailar 12
U Paiem Kynsai N Syiem uba dei u Syiem ka Hima Bhowal kaba hap ha Mawsynram Block, East Khasi Hills district u la ïathuh ba ka Hima ha kine ki bnai ka la dep bthah ïa ki shnong kiba don markhap bad ka ri Bangladesh ba kin long kiba peitngor ban ïada na ka jingwan kiew ki briew na Bangladesh.
Kane ka jingpynpaw u Paiem Kynsai ka dei hadien ba ki nongshong shnong bad ki pulit ka thanad Nonghyllam ki la ïoh kem ïa ki runar kiba la kiew na Bangladesh ban leh ïa ki kam pyntriem ha ki shnong kiba hap ha South West Khasi Hills District.
U Paiem u la pyntip ba ha Hima Bhowal ki briew na Bangladesh ki kham jynjar ban kiew namar ki la biang lut ki jaka ker sainar bad tang katto katne ki jaka ba wan ka wah Umngi hynrei ki BSF bad ki bor shnong ki la peitngor.
“Ngi la dep ai jingtip ruh wat ïa ki nongshong shnong ki bym dei Khasi ba kin peitngor haba ki sah ha khappud khnang ban nym ailad ïa ki nong Bangladesh ban kiew sha India,” u la ong.
Shuh shuh u la pyntip ba ka Hima Bhowal ka ju don ka jingbuh ryntih ïa ki nongshong shnong kumta ka kham suk ban peit pyrman ïa ki briew kiba wan na kiwei ki jaka haba ki wan sah sha Hima Bhowal.
U la ïathuh biang ba naduh ba la khang ka Border Haat ha Lalpani hajan Dangar ka long shngaiñ bha namar ym don shuh ka jingïadie ïathied bad ka ri Bangladesh.
U Paiem u la ïathuh ba sha shiliang ka Hima Bhowal kaba dei kaba hap ki shnong ha Bangladesh, ki nongshong shnong ki dei ki Bengalee.
U la pynpaw ba ha kiwei ki jaka khappud ki ïoh rung ki briew na Bangladesh, ka lah ban dei ba kim pat biang ki jaka ker sainar shiah.
