Shillong, Nailar 12
Ka Langsning FC bad ka Mylliem SC ki la ïasam mar shi point ha ka lympung ïalehkai Shillong Premier League, hadien ba ki la ïakhad mar 1-1 kol ha ka sngi Ba-ar ha SSA Stadium kaba ha First Ground Polo.
Hashwa ban sdang noh artad kane ka jingïakhun, u slap u la ther tyngeh shiphang ha kaba ka la pynlong ïa ka madan ban shem shitom ïa ki rangïalehkai. Watla kine ki kynhun kim shym la lah ban thep kol ha ka kylla step, pynban ka Langsning FC ka la ïoh ba kan pynkhih jar nyngkong ha ka minit kaba 48, kaba lah ban ong ba ka dei ka jingbakla thep hi da uwei na ki rangïalehkai ka Mylliem sha la ka jong ka kol. Hynrei u Miliancy Khongstia u la ïoh ïa ka kabu ban khyrwit kham jam bha ïa ka bol ha ka minit kaba 75 na ka bynta ka Mylliem.
Kane kan dei ka sien ba nyngkong ïa ka kynhun ïalehkai ka Mylliem SC ba kan ïashim bynta ha kane ka lympung, haba ïa nujor bad ka Langsning FC ka kynhun kaba la rah teng la arsien ïa ka nam lahduh.
Hynrei kum ka kynhun, ka la don lang pat ha ka kynhun ïa ki kato katne ki rangïalehkai kiba la kham rim kum ki jong u Miliancy, Alem Khongwir, Freestar Kharbangar, Shaibor Nongrum bad Remark Kharmalki, kaba pynwan dur ïa ka rukom ïalehkai jong ka.
Haba phai sha ka shi kol ba ka Langsning FC ka la ïoh ba kan thep lyngba u Dajied Wanshnong, u la lah ban pashat ïa ka bol, ïa kaba uwei na ki rangïalehkai ‘dien ka Mylliem u dang thmu ban pyndei da ka khlieh ïa ka bol sharud, phewse ka la leit rung pynban sha la ka jong ka kol.
Ka sur ïalehkai ka la noh sha ka kynhun ïalehkai ka Mylliem, kaba baroh ki rangïalehkai jong ka, la ïohi ba ki la ïalehkai bha naduh ka mynsiem, kaba la plie lad ïa ki ban ïoh bun bha ki kabu ksiar ban pynkhih ïa ka jar, ïa kaba la long lehnohei noh pat namar ka jingbym pat da lah ban da ïa mir bha hapdeng jong ki.
Wat la katta ruh, ka Mylliem SC kam lah ban khlem da hun jrut ka mynsiem ban lah shwa wat tang ba kan ïakhaid, hynrei na ka bynta ka Langsning FC, kane ka nam ïakhiaid ka buh ïa ka ha ka jingsngew khia kaba jur, namar kumba ïa tip, kane ka lympung kaba mynta ka snem kan don tang shi kylla (one leg).
Ka jingïalehkai ha ka sngi Balang kan long hadpeng ka Laitkor SC pyrshah ïa ka Malki SC kaban long ha ka por 5:30 janmiet.
