Jowai, Nailar 12
Ka Lumpyrtuh bad Khimusniang ki la rung sha ka semi-final jong ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA) hadien ba ki la khur jingjop ha ka sngi Ba-ar ha Kiang Nangbah Stadium, Jowai.
Ha ka jingïalehkai quarter final, ka Lumpyrtuh ka la pynliem noh ïa ka Catholic Youth lyngba ka tie-breaker da 5-4 kol.
Ha kawei pat ka jingïakhun, ka Khimusniang ka la pynliem noh ïa ka Ladthadlaboh da 4-0 kol. Ïa kine la thep da u Vishal Nongpluh (8), Meroyly Lytan (10), Richanmi o Lyngdoh (47) bad Sngewlang Bamon (60).
Ka jingïalehkai semi final kan long ha ka sngi Balang hapdeng ka Loomionkjam pyrshah ïa ka Lumpyrtuh ha ka por 1:30 mynsngi bad ka Mynsngat ïa ka Khimusniang ha ka por 3 baje nohphai sngi.
