Shillong Nailar 12
Ki nongdie madan ha lynti ïaid kjat ka Khyndai Lad ha ka 12 tarik u Nailar 2025 ki la bteng biang ban ïakhih da kaba shong kyllaiñ mungor ha katei ka jaka ban dawa na ka Shillong Municipal Board (SMB) ban ai noh ïa ka CoV khnang ba kin ïoh ban shong dukan ban pyndap ïa ka ïing ka sem.
Kine ki nongdie madan ki la sdang ïa ka jingïakhih da kaba shong kyllaiñ mungor bad rah ruh da ki plakad ha lynti ïaid kjat ha Khyndai Lad naduh ka 09 tarik u Nailar 2025 ban dawa na ka sorkar ba dei ban ai noh ïa ka CoV sha ki bad namar ba ka sorkar kam shem la jubab eiei halor kane ka jingdawa ki la shim da kane ka sienjam ban ïakhih.
Ki nongdie madan kim shem la kynriah na Khyndai Lad ban ïakhih bad mynta ka jingïakhih jong ki, ka la ïaid la kumba saw sngi lynter.
La sakhi ba hynne ka sngi ba ar ki nongdie madan kiba wan shong ïakhih biang ki don da ki phew ngut ki longkmie Khasi bad ruh ki bym dei ki Khasi.
Ha kine ki khyndiat sngi ba ladep ka la mih ka jingkynnoh na ki nongdie madan ba kane ka jingpynslem ka Shillong Municipal Board (SMB) ban ai CoV kadei namar ba ka kwah ba ki nongdie madan kin ïap thngan.
Lah ban kdew hangne ba dang shen ka sorkar ka la pynkynriah ïa ki nongdie madan kiba la ïoh ïa ka CoV sha ki dukan kiba la pynshna kyrpang kaba don ha jaka ïeng kali, MUDA.
Kum ban shu pynkynmaw ba ha ka 06 tarik u Nailar na ka liang u CEO ka Shillong Municipal Board ula lum ïa ka jingïalang jong ka Provisional Town Vending Committee (PTVC) ban ïakren halor katei hi ka mat bym pat ïoh CoV ki nongdie madan.
Hadien ka jingïalang ka kynhun Shillong Roadside Hawkers Association (SRHA) ka la pynpaw ba ka hun ïa ka jingïalang ba la lum da u CEO hynrei ka la pynpaw ruh ba ki don kumba 40 ngut ki nongdie madan ki bym pat ïoh ïa ka CoV.
