Austin, Nailar:
Uwei u ‘riew kieng-atiar ha ka Sngi Nyngkong, u la synreit kuli naphang ha kawei ka jaka ieng kali jong kawei ka dukan Target ha ka nongbah Texas, ha kaba u la ioh siat bad pyniap ym duna ia 3 ngut ki briew, nangta u la tuh ruh ia 2 tylli ki kali ha ka por ba ki phet krad hashwa ba ki pulit kin ioh kem noh da kaba pyndonkam da ka Taser ban kem ia u ha kawei pat ka liang jong ka nongbah.
Ka heh pulit jong ka Austin, ka Lisa Davis, ka la ong ba utei u briew u dei u briew uba la don ha ka rta kaba 30 snem bad la lap ba u don jingshitom ha ka bor pyrkhat.
Ka Davis ka la iathuh ba utei u briew u la phet krad na katei ka jaka da ka kali kaba u la tuh, u la pynher bad pynsniew ia katei ka kali nangta u la tuh sa da kawei pat ka kali na kawei ka jaka die kali. La ioh kem ia u na ka thaiñ Shatei Lam Mihngi jong ka Austin, ha kaba la rah ia u sha phatok, ka la ong ha ka jingialang bad ki nongthoh khubor.
Ka la ong ba ki ophisar kiba la wan jubab ki la lap ia 3 ngut ki briew kiba la shah siat iap ha ka jaka ieng kali jong ka Target.
U Heh jong ka Austin-Travis County EMS, u Robert Luckritz, u iathuh ba arngut ki briew, ki la duh ei ia ka jingim ha katei ka jaka bad ia uwei pat u briew, ba la ioh ban pynkit sha jaka sumar, la pynbna iap noh da ki doktor tang hadien katto- katne por ba la pynpoi ia u ha katei ka hospital.
Kane ka jingjia synreit kuli ka la jia ha ka por kaba bunkam bha, katba ki paidbah ki dang mih ban leit thied- leit siew bad sha ki kam- ki jam jongki ha katei ka thaiñ.
Na ka liang ki bor pyniaid ka Austin, ki la phah ia ka kyrwoh sngewlem sha ki bahaiing- bahasem jong kitei kiba khlad namar ka jingduh noh jongki ia kitei ki baieid- bathoiñ jongki ha katei ka jingjia ba sngewsih.
