Shillong, Nailar12
Ki pulit jong ka North Garo Hills ha ka jingïakhun pyrshah ïa ka jingdih duma ne sikret bad ka jingdie be-aiñ ïa u duma ha ki jaka paidbah bad ki la ai haduh 1,545 tylli ki challan bad ïoh lum kuna kaba kot T.1.52 lak ha kine ki 2 snem kiba la dep katkum ka Cigarettes and Other Tobacco Products Act (COTPA), 2003.
Lyngba ka jingtrei shitom bad ïakhun, ka NGH ka la long kum kawei na ki district ka jylla kaba la lah ban pyntreikam pura ïa ka jingpyrkhing ïa u duma. Kane ka jingleh ka long ban tehlakam ïa ka jingdih duma ha ki jaka paidbah bad ka jingdie ïa ki duma bad sikret ha ki jaka kiba don hajan ki jaka pule, bad ka shnat kaba la treikam bha – ka Wageasi OGC – kala ai 259 tylli ki challan bad ïoh T.30,050 kum ka jingdain kuna.
Ka Mendipathar WPS kala ai 231 tylli challan bad lum ïa ka kuna kaba T.17,200, ka Mendipathar PS kala ai 218 tylli ki challan bad dain kuna T.31,600 bad ka Rari OGC kala ai 198 tylli ki challan bad ïoh lum kuna kaba T.19,750 .
U Superintendent of Police jong ka North Garo Hills, u la ïaroh ïa ka jingtrei shitom jong ki ophisar ha kylleng ki thanad. “Ka thong ka jong ngi kam dei tang ban peit ïa ka aiñ hynrei ban ïada ïa ka jingim briew. Manla ki challan ka pyni ïa ka sienjam kaba ngi shim ban pynlong ïa ka district kaba shngaiñ bad kaba koit ba khiah,” u la ong.
Ïa kane ka campaign la kyrshan da ka National Tobacco Control Programme (NTCP) hapoh jong ka tnat Health & Family Welfare, NHM Meghalaya, lyngba ka jingai jingpynsngewthuh paidbah bad ki prokram ha ki skul.
Ka Dr. Nabneeta D. Mawrie, State Nodal Officer ka NTCP Meghalaya haba ai jingïaroh ïa ka kam kaba la leh da ki pulit, ka la ong, “U duma u dei uba lam sha ka jingïoh ïa ka jingpang bampong (cancer) bad ka jingkhlad kloi. Ka jinglah ban treikam bha ka North Garo Hills kala long ka nuksa ïa kiwei pat ki district.”
