Shillong, Nailar 13
Ka jingshong ïa ka Dorbar Synrai jong ka ïingdorbar thawaiñ ka jylla kan sdang naduh ka 8 tarik haduh 12 tarik Nailur, 2025. Ha kane ka dorbar synrai ba san sngi, kan kynthup 3 sngi ïa ki kam Sorkar bad 2 sngi na ka bynta ki kam jong ki dkhot shimet.
Ïa kane ka rai la shim da ka Business Advisory Committee (BAC) jong ka ïingdorbar thawaiñ ka Jylla, kaba la ïakynduh ha ka sngi Balang.
U Lamphang ka ïingdorbar thawaiñ ka Meghalaya u Thomas A Sangma u la ong ba ka BAC ka la ai jingmynjur na ka bynta ki sngi jong ka jingpynlong ïa ka jingshong dorbar synrai.
Haba kren sha ki lad pathai khubor, u Lamphang u la ong ba ka BAC ka la mynjur da kawei ka sur ïa ka por treikam jong ka dorbar synrai bad ong ka jingïalang ka la ïaid bha bad la wan ban ïashim bynta da baroh ki dkhot. Ka dorbar synrai kan sdang ha ka 8 tarik haduh 12 tarik Nailur.
Ha kylli halor ka rai ban sdang ha ka sngi Nyngkong ym ha ka sngi Thohdieng, u Lamphang u la batai ba kam dei ka kyndon kaba la buh beit.
“Kam dei kaba la teh kyndon ban pynlong Dorbar sngi Thohdieng namar wat ha ka sngi Thohdieng bad la pynjlan biang sha ka sngi Thohdieng namar ka shuti Janmashtami. Mynta u snem, da kaba duna ki Kam Sorkar, khamtam eh ki jingdawa ba la pyndap bad ki jingdawa jingïarap, ka Committee ka la mynjur ïa ka por naduh ka sngi Nyngkong haduh ka Thohdieng” u la pynshai.
Haba kylli hato ki Liang Pyrshah kila mynjur ne em ïa ka rai, u Lamphang u la pynthikna ba baroh ki dkhot, kynthup ïa ka Liang Pyrshah, ki sngewhun ïa ka jingbuh ïa ki sngi shong dorbar, da kaba bynrap ba kam shym la don kano kano ka jingpyrshah na kano kano ka liang.
Ha kane ka jingïalang la ïadonlang u Symbud Myntri Rangbah ka Jylla uba khmih ïa ka tnat Parliamentary Affairs u Bah Prestone Tynsong, u Nongïalam ka Liang Pyrshah u Dr Mukul Sangma (lyngba ka video conference na Tura), ki MLA kynthup u Bah Charles Pyngrope bad u Bah Lahkmen Rymbui, ryngkat ki heh ophisar ka Assembly.
