Shillong, Nailar 13
Ka President jong ka Indian Olympic Association (IOA), ka P.T Usha, kaba dei ruh ka dkhot ba shu sieh jong ka Rajya Sabha, ha ka sngi Balang, ka la ai jingkyrshan ïa ka National Sports Governance Bill, da kaba ong ba kan pynkut noh ïa ki phew snem ka jingbym lah ban pynïaid na ka bynta ban wanrah ïa ka jingkhuid jingsuba ha ka rukom treikam ha ki synjuk ïalehkai jong ka ri.
Ha ka jingïatai sani halor kane ka bill, kaba la mynjur da ka Lok Sabha ha ka lah sngi U Blei, ka Usha, ka la iaroh ïa ki kyndon jong ka, ba kynthup ïa ka jingthaw ïa ka National Sports Board (NSB), ka ban don ïa ka bor kaba halor ban ithuh ïa ki synjuk ialehkai (NSF). Ka jingpynïasoh bad ka NSB kan long kaba donkam ban ïoh ïa ka pisa na ka sorkar pdeng.
Katei ka bill ka tyrwa ruh ïa ka National Sports Tribunal ban peit ïa ki jingïakajia ha ki kam ïalehkai bad ïa ka National Sports Election Panel ban peit ïa ki jingthep vote ha ki ilekshon jong ki synjuk ïalehkai.
“Mynta ka sngi ka dei ka sngi kaba don jingmut haduh katta katta ha ka jingim shimet bad ha ka ri hi baroh kawei. Nga la ap slem bha ïa kane ka khyllipmat,” la bynrap ka Usha ha ka jingkren jong ka ha ka ïingdorbar.
Ka la pyrshah ïa katei ka bill ha u snem ba la dep, da kaba batai ïa ka kum ka jingwan tuklar jong ka sorkar bad ka la maham ba ka India ka lah ban kut noh ha kaba ïaleh pyrshah ïa ka jingkhang na ka International Olympic Committee. Hynrei naduh katei ka por ka la pynthymmai ïa ki jingmut jong ka hadien ka jingïasyllok bad u Myntri ka tnat ïalehkai u Mansukh Mandaviya.
“To ngan ïalam pat ïa phi sha u snem 1984, nga dang don tang 20 snem ha ka por ba nga la duh ïa ka takma Olympic ha Los Angeles. Ha katei ka sngi ka dohnud jong nga ka la pang, ym shym la don kano kano ka aiñ ïalehkai kaba bniah ban kyrshan ïa ki jingangnud jong ngi.”
“Naduh kata ka por sawphew snem ki la ïaid, ym shym la don eiei ban weng ïa ka jinglong jingman kaba sahkut. Mynta ka jingkyrmen ka la kylla long ka jingtreikam bad ka aiñ. Ka dei ka bill kaba don jingthmu bad kaba la sahkut la slem bha,” ka la bynrap.
“Kane ka bill kan wanrah ïa ka jinglong kaba shai, ka jingkitkhlieh, bad ka jingïahap hapdeng ki shynrang bad kynthei. Kan ai bor ïa ki nongïalehkai bad kan tei ïa ka jingshaniah hapdeng ki nongkyrshan bad ki synjuk ïalehkai,” ka la bynrap.
Ka Usha ka la ong ba ka jingpynbor jong ka bill ban thaw ïa ka rukom pynïaid kaba ryntih kan long ka jingïarap na ka bynta ka jingïakhun jong ka India ïa ka Olympic ha u snem 2036.
