Nongpoh, Nailar 13
Ha kawei ka jingjia ha ka 12 tarik mynta u bnai, uwei u samla u leit ban kynthih na jrong ka jingkieng Byrnihat bad noh sha ka wah Umtrew tang namar ka jingïakajia kam pisa tyngka bad la ki paralok kiba ïa dih drok lang.
Kane ka dei kaba la jia ha ka por kumba 9 baje mynstep ha katei ka sngi, ha kaba utei u samla uba la tip kyrteng kum u Wanphrangsngi Syiemlieh, 27 snem ka rta na ka shnong Nongkyndang, Saiden, hadien ka jingdep ban tuh bad die ïa kawei ka mobile phone, kala mih ka jingbym hun ha ka rukom sam ïa ka pisa kat haduh ba la mih ka huri hura hapdeng jong ki.
Hapdeng katei ka huri hura, la ïathuh ba kitei ki paralok kila byrngem ban shoh ban dat ïa u Wanphrang Syiemlieh bad ha ka jingtieng, une u samla u la phet krad ïalade bad kynthih beit jrain najrong jingkieng sha ka wah Umtrew. Kumba long mynta, ym lah satia ban tip la u dang im ne u la ngam jyllop ha kane ka wah, hynrei na ka liang ki bor jong ka Search & Rescue Team (SRT), ki pulit Fire & Emergency Services (FES) bad ki pulit na ka thanad Byrnihat ki dang pynlong ka jingwad ïa utei u samla.
