Shillong, Nailar 13
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong ha ka Sngi Balang u la ong ba ka Sorkar ka dang ap ïa ka kaiphod halor ka jingkynnoh jah rngai jong 4000 metrik ton u dewïong bad kan sa ujor ïa ka ‘Affidavit’ hakhmat ka Meghalaya High Court ynda ka la ïoh pdiang ïa ka kaiphod.
“Ngim pat ïoh pdiang (ïa ka kaiphod). Peit ngi hap ruh ban ai jubab sha ka ïingbishar. Kumta shen, kane kan sa urlong bad halor ka nongrim jong ka kaiphod ka ban ïoh na ka distrik ba dei khmih – nangta ngin sa ujor ruh ïa ka ‘Affidavit’ hakhmat ka Meghalaya High Court”, ong u Bah Tynsong haba kren sha ki nongthoh khubor.
U Bah Tynsong u la pynskhem ruh ba ka aiñ kan sa leh ïa kaba don-kam pyrshah ïa kino-kino ki kam be-aiñ, kynthup ïa ka jingtih dewïong.
Watla um pat ïoh ïa ki kaiphod kiba tikna halor ka jingtih dewïong be-aiñ, u Bah Tynsong u la pyntikna ba ka aiñ ka don ban khmih ïa kum kine ki jingeh.
“Ïa mynta, ngam pat ïohsngew eiei shaphang ka jingtih dewïong be-aiñ. Hynrei la ngi ïohsngew ne ngim ïohsngew, ka aiñ ka don ban jop ïa kito ki kam be-aiñ,” u la pynpaw.
U la ong ba ka Sorkar ka la shimkhia naduh u snem 2014 (hadien ka jingkhang tih dewïong ka NGT), ha kaba ki pulit bad ki bor distrik ki ïatreilang ban khanglad ïa ki kam be-aiñ ha la ki jong ki jong ki distrik.
“Ka jingbthah na ka Sorkar ka long kaba shai, ba phi hap ban trei shitom shisha ban pyntikna ba ki kam be-aiñ kin ym jia ha la ki jong ki jong ki distrik,” u la ong.
