Shillong, Nailar 13
Lai ngut ki rangïalehkai kriket ka Jylla hapoh ka lama jong ka Meghalaya Cricket Association (MCA), ki la shah jied ban kin mihkhmat ïa ka North East Zone jong ka BCCI ban ïakhun na ka bynta ka lympung ïalehkai jong ka Duleep Trophy 2025-2026.
Ki ne ki lai ngut ki kynhun ïa u Arpit Bhatewara ba dei u nongtied, kumjuh u Akash Kumar ba dei u nongkawang bol lem bad Aryan Bora (spinner), kiba la ïoh ban rung sha kane ka kynhun kaba don baroh 15 ngut ki nongïalehkai, ha kaba u Akash uba la don bynta ha ka samoi ïalehkai kaba la dep, u la shah jied syndon kum u vice captain jong kane ka kynhun.
Ïa kane ka kynhun la jied da ka North East Zonal Selection Com-mittee, ha ka jingïalang kaba la long ha ka lah sngi U Blei ha Guwahati, ha kaba ïa kane ka lympung jong ka Duleep Trophy la buh ba kan long ha Bengaluru naduh ka 28 tarik mynta u bnai haduh ka 15 tarik u Nailur, bad ïa ka kynhun ka North East Zone la kynthup lang ïa ki jylla kum ka Arunachal Pra-desh, Manipur, Meghalaya, Mizo-ram, Nagaland and Sikkim.
Nalor ka jingpynbna ïa ki kyrteng ki 15 ngut, ka jingïalang ka la pynbna ruh ïa ki 7 ngut kiwei pat ki kyrteng kum ban shu pynap lypa (stand by) kaba hangne ruh la mih paw sa kawei pat ka kyr-teng u samla ïalehkai na kane ka jylla u Dippu Sangma, ha kaba u Vikash Singh Chauhan, ba dei u nongïarap (trainer) ka Meghalaya la jied ïa u kum u nongïarap ia kane ka kynhun mynta ka snem.
Kum shi bynta ka jingpynkhreh ïa kane ka kynhun, ka la don ka jingïa-lum ïa lang lang da baroh ki nongïalehkai ha Dima-pur ïa kaba la peit bad pynïaid ïa ka da ka Naga-land Cricket Association ka ban sdang naduh ka 18-24 tarik mynta u Nailar, bad hadien kane, ka kynhun kan sa hiar pat sha Bengaluru ha ka 25 tarik mynta u bnai, bad ïa ka jinglut jingsep na ka bynta kane ka kynhun yn buria da ki synjuk ïalehkai kriket ki jylla ka thaiñ shatei lam mihngi.
Ki kyrteng ki rangïa-lehkai ka North East Zone ki long u Techi Doria (Arunachal), Yumnam Karnajit (Manipur), Sede-zhalie Rupero (Nagaland), Ashish Thapa (Sikkim), Hem Bahadur Chetri (Nagaland), Jehu Ander -son (Mizoram), Arpit Subash Bhatewara (Meghalaya), Pheiroijam Jotin Singh (Manipur), Palzor Tamang (Sikkim), Jonathan Rongsen (C) (Nagaland), Ankur Malik (Sikkim), Akash Kumar Choudhary (VC) (Megha-laya), Bishworjit Singh Konthoujam (Manipur), Aryan Borah (Meghalaya) bad Lamabam Ajay Singh (Manipur).
