Shillong, Nailar 13
Ka Shillong Lajong FC kan pynkhreh ïa ka jingïakhun quarter final pyrshah ïa ka Indian Navy F.T ha ka 134th Durand Cup 2025 ka ban long ha ka sngi Saitjaiñ ha ka por 4 baje nohphai sngi ha Jawaharlal Nehru Stadium, Polo.
Ka Lajong hapoh ka jingïalam u Birendra Thapa (Biru) ka la wan ha ka ka kyrdan ba-ar ha ka Group-E ha kaba ka la kamai 6 point bad duna tang shi point na ka lahduh jong u snem ba la lah, ka NorthEast United FC.
Te kumta lyngba ka jinglah ban ïalehkai bha ka la shah jied kum ka kynhun ba-ar na katei ka group ban ïoh rung sha ka quarter final ryngkat bad ka Diamond Harbour FC na ka Group-B. Katba kiwei pat ki kynhun kiba la wan ha ki kyrdan ba nyngkong ha la ki jong ki group ki long ka East Bengal (Group-A), Mohun Bagan (Group-B), Jamshedpur FC (Group-C), Bodoland FC (Group-D), NorthEast United (Group-E), Indian Navy FT (Group-F).
Kawei pat ka jingïakhun quarter final ka ban long ha kajuh hi ka sngi kan long hapdeng ka Bodoland pyrshah ïa ka NEUFC ha ka por 7 baje janmiet ha Kokrajar.
Kiwei pat ki jingïakhun quarter final kin long ha ka sngi U Blei hapdeng ka Jamshedpur pyrshah ïa ka Diamond Harbour ha ka por 4 baje nohphai sngi ha Jamshedpur bad ka Mohun Bagan ïa ka East Bengal ha ka por 7 baje janmiet ha Kolkata.
