Agartala, Nailar:
Ka Arunachal Pradesh Congress, ka la pynlong ïa ka jingïakhih ha Itanagar ha ka 12 tarik Nailar, ha kaba ka la pynpaw ïa ka jingkyrshan ïa u Rahul Gandhi, u nongïalam ka liang pyrshah jong ka Lok Sabbha bad ka la kynnoh ba ka sorkar ba la ïalam da ka BJP, ka la pynlong ïa ka “jingthombor lynter” ïa ka hok jong ka synshar paidbah.
Ïa kane ka jingïakhih kaba la pynlong shabar jong ka ophis treikam jong ka seng, Rajiv Gandhi Bhawan, la pynlong hapoh ka lama “Let’s raise our voices for the truth, justice, and democracy”.
Ki la pyrshah ruh halor ka jingshah set phatok jong ki katto katne ngut ki MP jong ka INDIA block ha ka jingïalang paidbah ha New Delhi ha ka lah sngi U Blei halor ka jingpynkylla ïa ka thup kyrteng jong ki nongthep vote ha Bihar.
Ki la don palat 30 ngut ki MP kiba la shah kem ha ka por ba ki dang leit sha ophis jong ka Election Commission ha ka nongbah jong ka ri ban pynpaw ïa ka jingpyrshah jong ki pyrshah ïa ka jingpynkylla ïa ka thup kyrteng thep vote .
Ki nongïalam jong ka Arunachal Pradesh Congress Committee (APCC) ki la kynnoh ba ki jingshah kem ki dei shi bynta jong ka jingpyrshang kaba kham heh ban “pyrkhing ïa ki sur jong ki nongpyrshah bad ban khanglad ïa ki jingkylli kiba dei hok ha ka saiñ pyrthei”.
Haba kren ha kane ka jingïalang jong ki nongbud ka seng, u heh nongïalam jong ka Congress bad Myntri barim ka jylla u Tanga Byaling u la ong ba u Gandhi kum u nongïalam ka liang pyrshah u don ïa ka bor katkum ka Riti synshar ka ri ban kylli jingkylli ïa ka sorkar halor ki mat kiba ïadei bad ka jingmyntoi jong ki paidbah.
