Shillong, Nailar 13
Ka Synjuk Ki Rangbah Shnong Ri-Bhoi District (SRSRB) ha ka 13 tarik Nailar, 2025, ki la leit ban ïakynduh ïa u Myntri ka tnat pynmih bording ka Jylla, u AT Mondal hadien ba na ka liang jong u Myntri, u la khot ïa ki ban wan sha ka miej jingïakren ban pynsngew ha u halor ka jingïakynduh jingeh ki nongshong shnong ka thaiñ Ri Bhoi namar ka jingduh bording kaba khah-khah.
Haba kren sha ki lad pathai khubor, u Secretary ka Synjuk, u Bah PB Sylliang, u la ïathuh ba ha kane ka jingïakynduh, u Myntri u la ai ïa ka jubab kaba sngewtynnad bad kular ba un pynbit pynbiang noh ïa kane ka jingthut ka bording ilektrik hapoh ka thaiñ Ri Bhoi baroh kawei.
U Bah Sylliang u la ong ba kane ka la jia la bun-bun snem ha katei ka thaiñ namar ka jingpynduh bording ilektrik kaba la ktah pat ïa ki paidbah khamtam ïa kito kiba sengkam sengjam lajong kiba pyndonkam da ka bording ilektrik ban treikam.
“Kane ka mat kam dei shuh ka mat kaba dang thymmai hynrei da ki phew snem ngi la ïaid. Kum ki nongshong shnong jong ka Them Ribhoi ngi don ïa ka Damsite hangtei kaba ngi ïohi ïa ka um ba ka dap hangto bad kaba pynmih bording hynrei ngi long kum kita ki langkñia kiba na ka por sha ka por, ngi mad ïa kine ki jingshah pynduh bording ileketrik bad ngim tip na kano ka daw”, ong u Bah Sylliang.
U Bah Sylliang u la pynpaw ba na ka liang ka Synjuk ka dap da ka jingbitar ïa ka tnat MeECL bad byrngem ruh ban leit khang tala noh shisyndon noh ïa ka ophis jong ka MeECL kaba don ha Umïam.
Shuh-shuh, u Bah Sylliang u la ong ba ka Ribhoi District kam dei tang ba ka don ïa ka Damsite kaba pynmih ïa ka bording ilektrik hynrei ka dei ruh ka distrik kaba pynmih ïa ka khajna kaba heh ban siew bad pyndap ïa ka jingsiew sha ki nongtrei jong ka MeECL hynrei kum ki nongshong shnong ka thaiñ Ribhoi District pat ki dap da ka jingsngewrem ba kin dei ma ki pat kiba mad ïa ka jingshah pynduh bording ilektrik kaba khah-khah.
Ka Synjuk ha kane ka jingïakynduh ïa u Myntri, ki la pynpaw ruh ha kaba ïadei bad ka jingduna ki nongtrei hapoh ka tnat MeECL bad ka jingdon ki post ilektrik kiba la sarang bad ki transformer kiba buh jingma ïa ki paidbah nongleit nongwan, kumta na ka liang u Myntri ruh u la pynthikna ba un sa shimkhia halor kine ki jingeh.
