Mawkyrwat, Nailar 13
Ka Hynñiewtrep National Youth Front (HNYF) South West Khasi Hills District hapoh ka jing-ïalam u Bah Shiningstar Wanniang, President bad u Bah Shimborlin Langte ha ka 13 tarik u Nailar, 2025 ki la leit ban ïakynduh ïa u Deputy Commissioner jong ka South West Khasi Hills District u Bah B. Mawlong ban kyrpad ban pynkynriah noh ïa ki shipai BSF kiba wan kyntur bad pynkylla ktem shipai ïa ka shnong 18 Mer kaba don harum ka Shnong Kalong bad kaba dei ka jaka kaba la jngai bad ka Bangladesh.
U Bah Shiningstar Wanniang haba ai jingkren hadien ba ka seng ka la dep ban ïakynduh ïa u DC, u la ong ba ka jingbuh ktem shipai ki BSF hapoh 18 Mer kam don jingmut eiei hynrei ka long pynban kum ka jingpynthut ïa ka ïaid ka ïeng ki paidbah Khasi. Shuh shuh u la pynpaw ruh ïa ka jingsngew bynñiaw halor ka jingïoh rung laitlain ka kynhun pyntriem na Bangladesh sha India ha kaba ki la shoh pynmynsaw ruh ïa uwei u samla Garo.
U Bah Shiningstar u la bynrap ruh ba ki BSF kum ha kine ki por ba jur ka jingwan rung tuh ki nong Bangladesh sha India ha ka jingshisha ki dei ban don ha ki jaka khappud marjan bad ka Bangladesh na ka bynta ban tehlakam bad ban peitngor ïa ka jingïoh rung laitlan ki nong Bangladesh hynrei kaba sngewsih ka long ba ki BSF ki kiew pynban sha ki shnong Khasi.
Ka seng ha kawei ka liang, ka pynpaw ïa ka jingsngew kmen hadien ba u Bah B Mawlong u la kular ba un sa shimkhia ïa kane ka kam bad un sa khot ïakren ïa ki BSF bad ki pulit.
