Shillong Nailar 13
U Syiem ka Hima Mylliem u Paiem Ainam Manik Syiem ula ong ba ka Ophis Hima Mylliem kam kwah ba kiba shong die madan na Khyndai Lad kin wan ban shong-die jingdie shapoh Iewduh.
U Syiem ula pyntip ruh ba haduh mynta ki don 403 ngut ki nongdie jingdie madan kiba shong die jingdie hapoh Iewduh. Ia kane u Paiem ula pyntip haba kren haka sngi baka Sorkar Jylla ka sam ïa ki song pisa ba mar T.10 hajar ïa ki 403 ngut ki nongdie jingdie madan kiba shong die jingdie hapoh Iewduh.
Haba kren ha kane ka sngi u Paiem Ainam ula ong ba haki khyndiat sngi ki don ki nongdie jingdie madan kiba shong ha Iewduh kiba sngewartatien namar ka Ophis Hima Mylliem ka phah pynrung kyrteng (Register) ïa ki. U Paiem ula ong ba ka jingphah pynrung kyrteng (Register) naka Ophis Hima Mylliem kadei ban tip katno ngut ki don ki nongdie jingdie madan kiba shong die jingdie hapoh Iewduh.
“Nga kyntu ïa kiba shong die jingdie madan khamtam ïa ki longkmie ban pynrung kyrteng ïalade ha ka Ophis Hima Mylliem khnang ban ïoh ki jingïarap kiba naka por shaka por” la ong u Paiem Ainam Manik Syiem.
