Mawkyrwat, Nailar 13
Uwei u dkhot ka kynhun pyntriem na Bangladesh ha ka 12 tarik u Nailar, 2025 u la kawang da ki tiar pynbthei ïa ki paidbah ha ka thaiñ Khonjoy ha South West Khasi Hills District katba ki paidbah ki dang pyrshang ban kem ïa u.
Ki tyllong khubor na ki pulit, la ïathuh ba ha ka sngi Hatmajai ki paidbah ka thaiñ Khonjoy ki la ïohi sa ïa uwei u runar suba nong Bangladesh ha ka shnong Majisora bad la ïathuh ba ki paidbah ki la pyrshang ban kem ïa u, hynrei u la lait bad phet noh sha kawei ka khlaw ba rben bad haba ki paidbah ki la beh ïa u, la ïathuh ba une u runar u la kawang da ar tylli ki tiar pynbthei sha ki paidbah bad pynlong ïa ki ban ym nud tur shuh.
La ïathuh ruh ba uwei napdeng kitei ki bom u la bthei katba uwei pat um shym la bthei, hynrei donbok ba ym shym la don mano mano ba mynsaw ha katei ka jingjia.
Na ka liang ki pulit ka South West Khasi Hills District ki la pyntip sha ka ‘bomb squad’ bad la ïathuh ba kin sa poi sha katei ka jaka ha ka 13 tarik u Nailar 2025 ban pynthikna ïa u jait tiar pynbthei ba la pyndonkam da une u runar.
La ong ruh ba tang mar ïa ïoh jingtip halor kane ka jingjia, ki pulit ka Nonghyllam bad ki shipai BSF ki la hiar mar mar sha katei ka jaka bad ki la pynlong ïa ka jingkhynra kaba jur ryngkat ka jingïarap jong ki paidbah nongshong shnong, hynrei haduh ba thoh ïa kane ka khubor ym shym la lap dien satia ïa utei u runar, ka daw ka long ba ki pulit bad ki BSF ki ïakynduh shibun ki jingeh ha ka jingthwet ïa utei u runar namar ka jingjur slap bad kumjuh ka jingrben palat u lyoh khyndew ha katei ka thaiñ, hynrei watla katta ruh ka jingkhynra bad jingthwet ka dang neh haduh mynta. La ong ruh ba une u runar uba lait phet salit na ka kti ki paidbah imat u dei uba la ïoh jinghikai ha ki kam tiar siat bad tiar pynbthei ban ïanujor bad kitei ki 6 ngut kiwei pat kiba la shah kem ha kine ki khyndiat sngi.
Ki tyllong khubor na ka thaiñ ki ïathuh ba ka jingshah thombor, jingshah rahbor bad jingpyrshang ban pynïap ïa uwei u samla na ka shnong Rongdangai, u Balsrang A Marak (21 snem) dang shen ka la pynbitar ïa ki paitbah ka thaiñ Khonjoy ha kaba ki la pynlong ïa ka jingthwet kaba jur ïa kitei ki runar.
Ki tyllong khubor ki la ïathuh ruh ba ha ka Sngi Nyngkong ki paidbah ka thaiñ ki la ïohi ïa uwei u runar suba khar Bangladesh ha katei ka thaiñ hynrei kim lah ban nud ban kem ïa u namar ba u don ïa ki tiar siat.
