Jowai, Nailar 13
Ka hat-trick ba la ïoh da u Saibor Nongrum ka la biang pura ïa ka Pohskur Phyllongingkhaw ba kan pynliem noh ïa ka Heibor Iong-i FC da 4-1 kol ha ka Super Division Football Tournament (Kelsiroy Pala Memorial) ba la pynïaid da ka Thadlaskein Sports Association (TSA) ha ka sngi Balang ha madan Wahïajer Multi Sports Complex.
U Saibor u la thep ïa kitei ki kol ha ka minit kaba 39, 80 & 90+5, ha kaba la bynrap da u Jendeng Mukhim (90+4). Katba ka Heibor Iong-i FC ka la pynkhih jar nyngkong eh lyngba u Kyntulang Dkhar ha ka minit kaba 10.
Ha ka jingïalehkai 2nd Division (Joybell Suiam Memorial Football Tournament), ka Myntoilang-i Bamkamar ka la pynliem noh ïa ka Mukhla Veteran da 3-1 kol. Ïa kine la thep da u Somiyo Mukhim (19), Samuel Challam (35), Damian Nongrum (72), katba na ka Mukhla Veteran la thep da u Kitkkhia Suna (4).
Ha ka jingïalehkai kaba bud ka Tyllilang-i Moobakhon ka la pynliem noh ïa ka Mukhla Mission da 3-1 kol. Ïa ki kol jong ka Tyllilang-I la thep da u Dashaniah Rymbai (13 & 34) bad Treles Ramut (56), katba na ka Mukhla Mission la thep da u Winchester Tang (72).
