Shillong Nailar 13
U Symbud Myntri Rangbah ka Jylla u Bah Prestone Tynsong ula ong ba kito kiba leit ïew ha Khyndai Lad kidei ki briew kiba sngew standard bad ki thaid ban leit sha Iewduh namar ba ki sma doh masai, sma dohkha, ban leit sha Iewduh, hynrei ula ong hadien ba ka sorkar kan dep ban pynitynnad ïa ka Iewduh, baroh kin sa wan ïew sha Iewduh bad kan kham itynnad shuh shuh ban ïa ka Khyndai Lad.
Ia kane u Bah Prestone Tynsong ula kren ha ka prokram sam pisa ba T.10 hajar sha ki nong die madan ha Iewduh kaba long hynne ka 13 tarik u Nailar 2025, ba la long ha jaka ïeng kali ha Anjalee.
U Bah Prestone ula ong ba ka Iewduh kadei ka ïew kaba shongkun kaba shong Blei bad ruh kadei ka ïew kaba don ka burom, ban kyniew ïa ka jylla, ïa ka ri bad ïa ka jaitbynriew jong ngi baroh kawei.
“Ha ka jingïaid lynti jong kane ka ïew hapoh ka jingpynïaid jong u Syiem ka Hima Mylliem, naduh ba nga dangrit haduh kane ka khyllipmat ba mynta, ngam pat ïohi ïa ka rekot ba kan don ka sorkar kaba ai jingïarap ïa kane ka Iewduh lyngba ka ophis jong u Syiem ka Hima Mylliem, lait noh ha kane ka sorkar kaba mynta. Lada nga kren kumta long thik ba nga ïaroh ïalade, hynrei nga ong ïaphi wat sngap ïa ka jingkren u Bah Prestone namar udei u politician, leit phaidien hi maphi ban pule ka khana bad kata kadei kaba donkam” la ong u Bah Prestone.
Ula ong sa ïanujor maphi ba kadei ne-em ka jingshisha kaba u Bah Prestone u kren mynta ha kane ka nohphai sngi.
“Jan T.20 klur ha ka wat ba nyngkong bad ka wat baar ban pynitynnad ïa ka Iewduh. Kandon sa ka wat balai bad kaba khadduh ban pyndep ïa ka jingpynitynnad ïa kane ka Iewduh baroh kawei” la bynrap u Bah Prestone.
Shuh shuh ula ong ba nga ngeit skhem ba ynda la pyndep sa ïa ka wat kaba lai, baroh kin ïa leit ïew lut hapoh Iewduh ymdei shuh ha Khyndai Lad, namar kiba bun kiba leit ïew ha Khyndai Lad, dei ki paidbah kiba ïa sngew standard. Ha kane ka jingpynitynnad na ka bynta ka wat balai kynmaw bha ba kan kham itynnad ka Iewduh ban ïa ka Khyndai Lad.
Kane ka jingleh ka sorkar ymdei ban ïoh jingmyntoi u Conrad ne u Prestone ne u Sñïewbhalang, hynrei kadei ka jingmyntoi ïaphi hi ki paidbah, ula ong.
Kumta u Bah Prestone ula kyrpad ruh ïa ki paidbah ba shongdie madan ha Iewduh ba kin sngewbha ban register noh ïalade khnang ba kin ïoh jingïarap kumba T.10 hajar lyngba ka CM Urban Livelihood Grand.
“Hooid ha kine ki sngi, ki ïa tienglut ban register, da kaba kynnoh ba dei ka jingpynshoi ki politician bad wat register namar phin sa shah beh na Iewduh. Kane ka Iewduh kadei kaba pynïaid da u Syiem ka Hima Mylliem bad ymdei jongno jongno ruh. ka DC kam lah ban beh ïaphi, ka Municipal kam lah ban beh ïaphi. Kane kadei kaba la pynïaid beit da ka Hima Mylliem” la bynrap shuh shuh u Bah Prestone.
