Imphal, Nailar:
Ka jingithuh bad ka jingpynkynriah ïa ki briew kiba wan na Myanmar bad Bangladesh be-aiñ ka long kaba kongsan bha ban pynthikna ïa ka jingshngaiñ bad ka jingbun briew ha Manipur, la ong u Myntri Rangbah barim ka jylla u N, Biren Singh.
U la ai khublei ruh ïa u MP ba marwei jong ka Rajya Sabha na Manipur u Leishemba Sanajaoba uba la wanrah ïa kane ka mat ha Parliament.
Ha ka jingthoh ha ka rynsan X ha ka janmiet jong ka lah sngi U Blei, u Singh u la ong, “Nga ai khublei ïa u MP ba donburom u MaharajaManipur uba la pynpaw da ka jingshlur ha ka Parliament ïa ka jingdonkam kyrkieh ban lap, ithuh bad pynkynriah noh ïa ki nongwan buhai shnong be-aiñ na Myanmar & Bangladesh, ka mat kaba kongsan bha na ka bynta ka jingithuh, ka jingshngaiñ bad ka jingïahap jong ka jingbun briew jong ka Manipur.”
U Singh u la ong ruh, “Katba kiwei pat ki MP ki la sngap jar, phi la kren da ka jingshlur bad jingshai, da kaba pynpaw ïa ki jingeh jong ki briew jong ngi khlem da artatien. Kane kam dei tang ka jingdonkam ha ka liang ka synshar khadar, hynrei ka dei ka kam ban ïada ïa ka hok, ka kolshor, bad ka lawei jong ki briew jong ka Manipur.”
Kane ka jingkren jong u Singh ka long hadien ba u Leishemba Sanajaoba uba long u dkhot jong ka Rajya Sabha, u la ong, “Kan long kaba sngewsih shibun ïa ka jylla Manipur lada ka jingkheiñ briew kan long shwa ban lap, ithuh bad pynkynriah noh ïa ki nong Myanmar bad Bangladesh kiba wan buhai shnong beaiñ kiba la dep ban shong shnong ha ki bynta bapher bapher jong ka jylla.”
U MP u la ong ba ka tnad kam pohïing ka la dep bthah ïa ki jylla bad ki Union Territory ban lap bad beh noh ïa ki nong Myanmar bad nong Bangladesh kiba beaiñ hapoh shibnai, kaba treikam naduh ka 19 tarik, Jymmang, 2025.
Hynrei ym shym la ïohi ïa kano kano ka sienjam kaba skhem na ka sorkar jylla haduh kine ki sngi, u la kynnoh.
U Sanajaoba u la ong ruh, “Ka jingpynlong ïa ka jingkheiñ briew shwa ban pynbeit ïa ka mat jong ki nongwan buhai shnong beaiñ kan wanrah ïa ka jingkulmar ha ka imlang-sahlang bad kan wanrah ruh ïa ka jingduh noh ïa ki hok Riti synshar jong ki nongshong shnong ka Manipur.”
U la ong ruh ba ki kaiphod jingkheiñ briew jong u snem 2001 bad 2011 ki long kiba ïaleh pyrshah bha namar ka jingkiew palat jong ka jingbun briew.
“Bad…ha ki lai tylli ki bynta jong ka Senapati, la ïohi ïa ka jingkiew kaba phylla jong ka jingbun briew kaba long haduh 202.88 percent hapdeng ka jingkheiñ briew jong u snem 2001 bad 2011 ha ka jylla,” u la bynrap.
