Nongstoiñ, Nailar 13
Watla ki la wan ban jngohkai ïa bun jaka ban peit ïa ka jingitynnad jong ki kshaid bapher bapher hynrei ka Kshaid Weinia, ka dei kawei na kiba khampher na baroh bad hadien ba ki la ïohi ïa ka, ka mynsiem ka la hun jrut wad lada ki hap ban phai noh sha la ïing, pynpaw ki shi kurim haba kren bad u nongthoh khubor.
Ka Kshaid Weinia ka dei kawei na ki Kshaid kaba don ha ki bynta jong ka dewlynnong Nongkhnum jong ka West Khasi Hills District bad lah ban kdew hangne ba ïa ka dewlynnong la thaw bad pynlong da ka jingphiah jong ka Wah Kynshi, bad kumba ka paw bad ïohi mynta ka jingkhring jong katei ka jaka ka dei namar ka jingdon ka jingitynnad kata nalor ka dewlynnong, ki shyiap (beach), bad ki Kshaid.
Kitei ki ar ngut kiba kynthup ïa u Nip bad ka kurim jong u lem bad ki khun, ki dei na ka Jylla Assam ha kaba ki la pynpaw ruh ïa ka jingsngew kmen kaba khraw hadien ba kila wan jngohkai ïa ki lum pyngngad jong ka dewlynnong ha Nongkhnum kaba ki la ai ruh ka jingïaroh halor ka jingitynnad, hynrei mynta na ka liang ka Dorbar Kur Ïawren Ïawlar Nongsangriang kaba dei ki trai khyndew jong ka Nongkhnum ha ka sngi Balang jong ka taïew ki la pynbna paidbah ba yn khang noh shuwa shipor bad ban ym shah shuh ïa kino kino ki briew kiba leit jngohkai ïa ka Kshaid Weinia tad haduh ba yn pynbna da kumwei pat.
Ïa kane la pynpaw da u Bah Divingstone Ïawren, Secretary ka Dorbar Kur Ïawren Íawlar Nongsangriang ryngkat u Bah Blasius Ïawren, Chairman ka Dorbar Kur Ïawren Ïawlar Nongsangriang haba kren bad ki nongthoh khubor ha ka sngi Balang jong ka taïew.
Ki la ong ruh ba ka daw jong ka jingkhang ka dei namar ka dang don ha ka kynrum kynram ha kaba ïadei bad ki nongshim wai ïa ka jingkhrong ïa ka jaka ïeng kali (parking) ha katei ka jaka.
Shuh shuh la ong ruh ba haba ïadei pat bad ka khyrdop kaba don ha ka shnong Diengsyiang naduh mynta ka sngi kan ym don shuh kano kano ka jingkhrong pisa ïa kiba leit jngohkai ïa ka dewlynnong Nongkhnum hynrei kane ruh kan long tang shipor tad ynda pynbna biang sa da kumwei hadien ba la dep pynbeit shuwa ïa ki kynrum kynram haba ïadei bad ki nongshim wai.
