Aizawl, Naiwieng:
U Myntri Rangbah ka Mizoram u Lalduhoma u la sdang ïa ka Intensified IEC Campaign halor ka jingpang HIV bad ïa ka HIV Test Drive Campaign 2025, kaba thmu ban pynïar ïa ka jingpynsngewthuh bad test ha baroh kawei ka jylla.
Kane ka prokram, kaba la plie ha ka sngi Ba-ar ka la long hapdeng ka por ba don ka jingkiew jong ka jingpang HIV wat hapdeng ki jingpyrshang ban pynsngewthuh paidbah kiba la slem bha.
U Myntri ka tnat ka koit ka khiah u Lalrinpuii, uba la long kum u kongsan ha ka prokram, u la ong ba ha u snem 2024-25, ka jingsaphriang lyngba ka jingshongkha khleh ka long 68.13 percent na ki nongpang HIV bathymmai, katba 29.25 percent ka mih na ka jingïapyndonkam ujuh u thyrnia injek hapdeng ki nongdih drok. Lada pynïasoh lang, kine ki ar tylli ki daw ki long 97.38 percent na baroh ki jingpang.
Ka la kdew ba bun ki briew kiba la shah test ki la tip lypa kumno u HIV u saphriang, hynrei ki dang bteng ban leh ïa ki kam kiba don jingma.
U Myntri Rangbah u la kyntu ïa ki paidbah ban kiar na ka jingdih drok bad ka jingïashongkha khleh khlem ki lad jingïada, bad khot ïa kito kiba don ïa u khñiang jingpang HIV ban kiar na kaba pynsaphriang ïa une u khñiang jingpang sha kiwei pat.
U la kyrpad ïa ki nongïalam shnong, ki nongtrei ka koit ka khiah, bad ka seng ki samla ka Young Mizo Association ban shim ïa ka bynta kaba radbah ha ka jingïada, da kaba pynpaw ba ki daw ba kongsan jong ka jingpang ki ïaleh pyrshah bad ki jinglong Khristan jong ka jylla.
Ka Mizoram ka la buh jingkynmaw 32,994 ngut kiba ïoh ïa u HIV naduh u snem 1990. Tang ha u snem 2024-25 la lap ba la don 2,471 ngut kiba dang ïoh ïa u khñiang, kynthup ïa ki 140 ngut ki kynthei kiba armet.
Ki heh sorkar ki kheiñ ba 97 percent na ki jingpang ha ka jylla ki long kiba lah ban ïada.
Hapoh ka jingïalap paidbah kaba mynta, yn pynlong ïa ki prokram pynsngewthuh bad ki jingïaleh ban test ha baroh 88 tylli ki shnong ha kylleng ki 11 tylli ki district jong ka Mizoram, da ka thong ban ïoh ïa ka jingpynbna ïa ka jingtest kaba heh tam.
Ka jylla ka dang sah hapdeng ki phra tylli ki jylla ba pawnam jong ka India na ka bynta ka jingïada bad jingsumar kaba paka ïa u HIV/AIDS.
