Shillong, Nailar 13
Ka O.M Roy Memorial Higher Secondary School la long ka lahduh ha ka 1st Tur Shaphrang Knockout Football Tournament 2025 ba la pynïaid da ka Hyn-ñiewtrep Youth Council (HYC) Mawlai Circle, hadien ba ka la pynliem noh ïa ka Shillong College da 4-1 kol ha ka sngi Balang ha madan Heh Mini Stadium, Mawlai Phudmuri.
Ka jingpynlong ïa kane ka lympung ka long shi bynta ban ïakhun pyrshah ïa u drok uba la sdang ban kynrei bha ha ka Jylla bad ban pynshlur ïa ki khynnah ba kin pynmlien ha ki jingïalehkai phutbol.
Ha kane ka sngi la ïadon lang u President HYC Sengkmie u Bah Roy Kupar Synrem kum u kongsan, kumjuh u Vice President Bah Donbok-0lang Kharlyngdoh bad kiwei kiwei ki dkhot jong ka Mawlai Circle.
Te kumta ka OM Roy ka la ïohpdiang ïa ka song pisa kaba T.30,000 hajar tyngka bad ka Shillong College ka la ïoh T. 20,000 hajar ryngka ryngkat ki trophy. Ki rangïalehkai ka O.M Roy ki la ïohpdiang ruh ïa ki khusnam shimet ha kaba u Comfort Kharbani u la ïohpdiang ïa ka nam Best Goalkeeper, Best Player ka leit sha u Mebanlamlynti Masharing bad Top scorer sha u Samborlang Langte.
Ha kane ka lympung la wan shim bynta da 13 tylli ki kynhun ïalehkai na ki skul bapher bapher na kane ka nongbah lem bad ki jaka ba marjan kynthup ïa kawei ka kynhun kaba naduh Mawsahew.
Haba ai jingkren ha kane ka sngi u Bah Roy Kupar kum u kongsan u la ong ba ka jingpynlong ïa kane ka lympung ka long shi bynta ban pyllait na ki khynnah ki samla na ki jingdih pynbuaid khamtam u drok uba la sar naphang ka Jylla. “Ka Jylla jong ngi ka la don hapdeng ka jingma na ka jingkynrei u drok, te kumta ngi pynlong ïa kum kine ki lympung ïalehkai phutbol ka long ban pynshlur ïa ki khynnah ba kin pynmlien ïalade ha ki kam ïalehkai khnang kin lait na ki jingdih kiba sniew.”
Ha kawei pat ka liang u Bah Donboklang u la ong, “Ka jingkynrei ki nongdih drok ha ka Jylla jong ngi mynta ka la tam kham bun ban ïa ki nongdih kyiad. Na ka liang ka seng na kapor sha kapor ngi la ïakhun pyrshah bad ki bor pulit kumno ban pynduh jait ïa utei u jingdih uba sniew, hynrei ka long kaba eh bad kaba jynjar namar une u jingdih pynbuaid u la rung wat haduh ki khynnah kiba dangrit rta ruh.”
