Shillong, Nailar 13
Ka Sorkar Meghalaya ka la pynkhlaiñ ïa ki bor pahara ha baroh kawei ka Jylla kum shi bynta jong ka jingpynkhreh ïa ka jingrakhe Sngi Laitluid ha ka 15 tarik u Nailar.
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong, ha ka Sngi Balang u la pynïaid ïa ka jingïalang bad ki heh distrik ban khmih bniah ïa ka jinglong-jingman ka shong suk shong shngaiñ ha ka Jylla.
“Nga la khmih bniah (ïa ka jinglong-jingman ka shong suk shong shngaiñ) na bynta ka jingrakhe ïa ka Sngi Laitluid ka ban sa wan, bad baroh ki Deputy Commissioner (DC) bad ki Superintendent of Police (SP) ki la pyntikna ïa ngi ba ki jingrakhe kin long kiba suk ba saiñ bad kiba lait na kino-kino ki jingpynthut,” ong u Bah Tynsong haba ïakren bad ki nongthoh khubor.
Watla la kynnoh ba ka jingïashim bynta ka duna ha kine ki snem ba la dep, u Bah Tynsong u la pynshong nongrim ïa ka jinghiar namar ka jingjur slap bad pynpaw ba ka jingwan ïashim bynta ka long kaba sngewhun ha ki por ba la dep.
“Kata ka long kaba bakla lada phi ong ba ha kine ki ar snem ba la dep, ki briew kim shym la wan ban ïashim bynta ha ki jingrakhe. Lait noh sa tang namarba jur u slap, lada jia ba u slap jur, kata ka ïaid da kumwei pat. Lada peit ïa ki rekod, ka jingwan ïashim bynta ka long kaba sngewhun bha”, u la ong haba pynpaw ïa ka jingkyrmen skhem ba ki briew kin sa wan poi bun shah ban rakhe ïa kane ka Sngi Laitluid mynta u snem.
Katkum ka jingong jong u, la pynmih ïa ki jingbthah kiba shai ban pyntikna ba ki jingrakhe kin long kiba i-shongkun bad kiba jop.
