Shillong, Nailar 13
U Bah Sanbor Shullai uba dei u MLA jong ka South Shillong Konstitwensi, ha ka sngi Balang u la leit ban rakhe ïa la ka jong ka sngi kha ne ka jingdap 58 snem pura bad ki khunswet jong ka Rilang Children’s Home kaba don ha Nongshiliang Nongthymmai.
U Bah Sanbor Shullai lehse un dei u MLA ba nyngkong hapoh ka jylla ban leit rakhe bad lehkmen ïa la ka jong ka sngi kha bad ki khunswet ha ryngkat bad ki jingai sngewbha sha kine ki khynnah bad ym tang katta, kum ka jingai sngewbha sngi kha sha kane ka jaka ri khunswet u la pynbna ruh ban mang pisa haduh T.7 lak tam na ka bynta ban pynmaramot ïa ka madan ïalehkai basketball.
Kane ka jingleit rakhe bad lehkmen jong u Bah Sanbor ïa la ka jong ka sngi kha bad ki khunswet, ka la pynkmen shi katdei eh ym tang ïa ki khynnah bad ki nongpynïaid jong kane ka jaka, hynrei ka la pynkmen ruh ïa u Bah Sanbor uba la ong, “Nga dap da ka jingkmen kaba khraw ban ïoh leh kmen bad phi ki khunswet bad kane ka dei ruh ka jingkmen kaba heh tam ha ka jingim ka jong nga.”
U Bah Sanbor u la ong, “Kam don jingmut satia ban leit rakhe bad lehkmen ïa ka jingkhawai sngi kha ha ki hall kiba heh, ban ïabam ïadih bad ban shu bret kai ïa ka pisa da ki lak tyngka. Kane ka dei ka rukom kaba biang tam na ka bynta ban ïoh ban noh synñiang sha kum kine ki jingdonkam khamtam na ka bynta kito kiba wan na ki longïing kiba duk ba suk, kaba ym tang ba ka wanrah ka jingkmen ïa nga hynrei nga ruh nga ïoh ban leh eiei na ka bynta jong ki, kum ka lad ban ïadon bynta lang bad ki.”
Ha kane ka sngi, nalor ki jingrwai kiba la ai da ki khynnah kiba sah ha kane ka jaka, na ka liang jong u Fr James Thyrniang uba dei u in-charge jong ka Rilang Children’s Home, u la pyni lyngba ki dur ïa ki jingïaid lynti jong kane ka jaka naduh kaba sdang kata naduh u snem 2001.
Halor ka jingpynpaw jong u Fr James halor ka jingdonkam ban maramot ïa ka madan Basketball, na ka liang u Bah Sanbor u la kular ban ai bad ong ban mang noh ïa ka pisa kaba long 7 lak 9 hajar tam na ka MLA Charitable Fund.
Ha kane ka sngi, u MLA u la ot ruh ïa u cake sngi kha bad hadien kata u la ïoh ruh ban sam ïa ki jingai sngewbha sha ki khynnah kiba sah ha kane ka jaka bad kumjuh ruh ïa ki nongtrei bad nongpynïaid jong kane ka jaka.
