Shillong, Nailar 13
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah prong tuh jong kiba bun tylli ki ïing nalor kiwei pat ki kam tuh na kylleng ki jaka jong ka nongbah Shillong.
Katkum ka khubor kaba la ïoh na ki pulit, la ong ba u Santosh Paswan u la ai ka jingujor ba ha ka 11 tarik mynta u bnai ha ka por kumba 3.50 dang step, ki runar bym lah ban ithuh ki la prong tuh ha ka quarter kaba u sah ha Parking Area Gora Line hajan jong ka Hq., Chief Engineer, Shillong Zone bad ban rah tuh ïa ki ar tylli ki shaka jong ka kali Bolero ka jong u, kaba don ïa u registration number 23B-138926H.
Na ka liang jong u Shivam Joshi ruh u la ai ka jingujor sha ki pulit ba ha ka 9 tarik mynta u bnai, ki runar bym lah ban ithuh, ki la tuh ïa ka mobile phone ka ojng u, na ka ïingsah ka jong u, kaba don ha Lapalang, Pdengshnong, Shillong.
Kumjuh ruh na ka liang jong u Sanjay Thapa u la ujor sha ki pulit ba ha ka 11 tarik mynta u bnai, ha ka por mynsngi, ki runar bym lah ban ithuh, ki la prong tuh hapoh ka ïingsah ka jong u kaba don ha Lapalang, Pdengshnong, Shillong bad ban tuh ïa ki ksiar, kawei ka mobile phone bad ka pisa kaba long T.15 hajar.
Na ka liang jong u Monish Dutta u la ai ka jingujor ba ha ka 10 tarik mynta u bnai, ha ka por kumba 5 baje janmiet, ki runar bym lah ban ithuh, ki la tuh haduh kumba sanphew tylli ki shatri kiba dei jong ka Tilaknagar Industries Wine Company, ïa kiba la buh hapoh ka ïing jong u ha Bengali Colony, Mawbah, Shillong.
Ha kawei pat ka khubor, u Ganesh Dhar u la ai ka jingujor ba ha ka 6 tarik mynta u bnai, ha ka por kumba 4.40 baje dang step, ki runar bym lah ban ithuh ki la prong tuh hapoh ka ïing jong u, kaba don ha shnong Pynthorbah ha Ri-Bhoi bad ban tuh saw tylli ki synduk copper bad kawei ka mobile phone.
