Shillong, Nailar 13
Ka Malki SC ka la lah ban khur ïa la ka lai point ba nyngkong eh ha ka Shillong Premier League, hadien ba ka la pynliem noh ïa ka Laitkor SC da 1-0 kol ha ka sngi Balang ha SSA Stadium kaba ha First Ground Polo.
Ïa kane ka shi kol jong ka Malki SC, ka dei kaba la ïoh thep da u Fashioning Syngkli, tang hapoh ka 45 sekon ba la sdang jong kane ka jingïakhun, kaba long artad ka kol ban kyrsiew thiah ïa ka kynhun ïalehkai jong ka Laitkor SC.
Hadien ba la dep ban shah thep kane ka shi kol, ka Laitkor SC, ka la mad ïa ka jingeh kaba tasam tam hadien ba u Felixdarren Suting, u la shah beh syndon na madan hadien ba u la shah sei da ka red card na ka daw ba u la pynur ïa uwei na ki rangïalehkai ka Malki.
Ha kane ka jingïakhun u rangapkol ka Malki SC, u Franklyn Surong, uba la lah shisha ban kyrda ïa kiba bun ki bol kiba la khyrwit da ki rangïalehkai ka Laitkor, katno tam lei lei ban kyrda wat ïa kawei ka penalty ha ka minit kaba 58, hadien ba u la shut da u Euvasius Mawthoh jong ka Laitkor SC.
Ha ka minit kaba 79 u Franklyn Surong ula pynpaw ïa la ka jong ka sap ap kol kaba kynsai ka jong u hadien ba u la lah ban kyrda ïa ka bol kaba la khyrwit jam da u Sanky Kharkongor bad ha kaba jan kut noh artad jong ka jingïakhun u Freelyson Tariang bad u Samborwell, ki la khyrwit ïa ka bol ïa kaba la kyrda biang pat ïa ka da une u rangapkol ka Malki SC, kaba la ïai bteng ba kan jam shakhmat ban khur ïa ka lai point kaba pura.
Haba wan ban bteng ïa ka kylla miet, ka Laitkor SC kampher wat hadien ka jingduna noh uwei u player ha madan, ka la lah ba kan ïalehkai kham bha bad ban ïa mir bha hapdeng para player, kaba na ka por sha ka por, lah ban ong ba ka jingïakhun ka la long shiteng sha ka kut madan jong ka Malki SC, hynrei donbok ba ki rangïalehkai shadien ka Malki, ki kylla long ki shon shat ba tyngeh ïa la ka kol bad bynrap da ka jinglah ban ap kol bha ka jong u Franklyn Surong, kaba pynhun hi jrut ïa ka mynsiem jong baroh kiba poi ban sakhi ïa kane ka jingïakhun.
Kane ka lympung kan bteng biang ha ka sngi Palei ha kaba ka Rangdajied United FC kan ïakhun pyrshah ïa ka lahduh ka aïom ba la lah, ka Shillong Lajong FC ha ka por 5:30 janmiet.
