Shillong Nailar 13
U Myntri Rangbah ka Jylla u Conrad K Sangma u la pynbna ba ka sorkar mynta ka dangpynkhreh ban bei tyngka palat T.40 haduh 45 klur na ka bynta ban pynbha ïa ki jingtei baroh kawei bad ban pynitynnad ïa ka Ïewduh.
Ia kane u Myntri Rangbah ula pynbna ha ka jingïalang sam pisa sha ki nongshong die madan ha Ïewduh ha ka jingïa-don ruh ki Myntri Sorkar naduh ki Symbud Myntri Rangbah u Bah Prestone Tynsong, Bah Sñïawbha-lang Dhar, Kong Ampareen Lyngdoh, u MLA Bah Sanbor Shullai, ki ophisar ka tnad Urban bad SMB nalor u Syiem bad ki Myntri ka Hima Mylliem bad ruh da ki spah ngut ki nongshong ïew.
Haba kren ha ka jingbuh maw nongrim na ka bynta ka bynta kaba ar jong ka projek kaba la mynjur da ka North Eastern Council (NEC) ha ka dor kaba T.14 klur, u Sangma u la ong, “Nga la ai khublei ïa u myntri ka union DoNER jong ngi na ka bynta ka jingai sngewbha jong u. Hadien ba ngi la ïakren bad u shaphang ka jingdonkam jong ka Iewduh, da ka jingkmen kaba khraw u la mynjur ïa ka pisa bad mynta ka sngi ngi la buh ïa u maw nongrim na ka bynta ka bynta kaba ar jong ka projek pynitynnad ïa ka Iewduh.” U la bynrap.
“Ngi la dep sdang ïa ka bynta ba nyngkong jong ka jingpynbha kaba T.5 klur bad phi la ïohi mynta ka sngi ba ngi dang jurip bad ngi dang peit bniah ïa ki kam kiba la dep”, u la ong.
U Myntri Rangbah ula pynbna ruh ba dang pynkhreh ïa ka kaiphod ba bniah jong ka projek (DPR) na ka bynta ka bynta kaba lai, kaba la khmih lynti ba kan pynlut kumba 20 klur tyngka.
“Kane ka mut ha ka jingkheiñ kyllum la jan 40 – 45 klur tyngka kan sa pynlut ban pynbha ïa ki jingtei baroh kawei bad ban pynitynnad ïa ka Iewduh,” u la ong haba kyrpad ïa baroh 5,500 ngut ki trai dukan bad ki nongdie madan kiba la pynrung kyrteng bad ka Hima Mylliem ban pynneh pynsah ïa ka jingkhuid jingsuba jong ka ïew Iewduh.
“Lada baroh ngi ïatylli bad leh ïa la ka jong ka bynta, nga ngeit skhem ba ka Iewduh kan sa long kawei na ki ïew ba itynnad tam ym tang ha Shillong hynrei ha baroh kawei ka thaiñ Shatei Lammihngi bad ka Ri India baroh kawei. Kata ka dei shisha kaei ka thong jong ngi bad nga pan ïa ka jingïatreilang jong phi khnang ba ngin lah ban pynurlong ïa kata ka thong,” la bynrap shuh shuh u Myntri Rangbah.
U Myntri ula pynpaw ruh ïa ka jingsngewkhia halor ka jingbym don ka jingpynroi ha ka Iewduh bad ula ong ba wat hapdeng ka jingkiew ka ïoh ka kot jong ka jylla baroh kawei, hynrei ka Iewduh ka la sah haduh katta katta khlem jingkylla haduh jan 35 snem.
Ula ban jur ba ka khana jong ka jingroi jong ka jylla kam long kaba pura khlem ka jingroi jong ki nongdie jingdie kiba rit, ki nongdie dukan, ki nongrep, bad ki nongseng kam seng jam kiba ïaleh ban kamai jakpoh man la ka sngi.
Haba ïadei bad ka jingleit jurip jong u ïa ka Iewduh ha u bnai Jymmang, mynta u snem, u Myntri Rangbah u la ban jur ba ïa ki rai kiba ktah ïa ka jingim jong ki briew ym lah ban shim, hynrei ka donkam ïa ka jingsngewthuh kaba na tynrai shaphang ki jingeh jong ki.
U Myntri Rangbah ula kyrpad ïa baroh kiba shong ïew ba kin sumar khuit namar kane kadei ka ïew jongphi khnang ba kan khring ïa ki nongwan jngohkai pyrthei ban rung hapoh Ïewduh.
“Bad kumta katba ka sorkar kan leh ia la ka bynta, Katba ka Hima mylliem kan leh ia la ka jong ka bynta. Ba kum ki nongdie jingdie, kum ki nongdie dukan, baroh phi dei ban don ka jingkitkhlieh ban pynkhuid ïa ki jaka ba phi die, ban pynthikna ba kaei kaei kaba phi leh kan long ka jingmyntoi” la bynrap u Myntri.
