Nongstoiñ, Nailar 14
Ha ka sngi Palei ka ophis jong ka District Medical & Health Officer (DMHO) WKHD, ha ryngkat ka jingïasnohkti lang bad ka Meghalaya Aids Control Society (MACS), kila ïoh ban pynlong ïa ka Integrated Health Camp hapoh Nongstoiñ ha kaba ka Myntri ka koit ka khiah ka Kong Ampareen Lyngdoh kala long kum ka kongsan.
Ha katei ka sngi ïa ka Integrated Health Camp la ïoh ban pynlong hapoh ka phyllaw jong ka skul Ri Khasi Free Morning School hapoh ka shnong Tiehsaw, Nongstoiñ ha West Khasi Hills.
Ïa ka Integrated Health Camp la ïoh ban sdang naduh ka por mynstep ha kaba ki nongtrei ka tnat ka koit ka khiah kila ïoh ban leh test bad ai dawai ïa kiba bun ki paidbah bad na ka liang jong ka tnat kala wanrah kyrpang ruh ïa ka kor Breast Screening ban test ïa ki longkmie.
Shuh shuh ha kane ka sngi la donlang ruh u MLA ka Nongstoiñ u Bah Gabriel Wahlang, u Principal ka skul u Bah K Shadap, ka Dr. N Kharsohnoh DHS MCH&FW, u Bah Garod LSN Dykes DC ka WKHD, ki doctor bad kiwei kiwei.
Ha katei ka sngi kila don haduh 74 ngut kiba la wan sha katei ka health camp bad 9 ngut kiba la wan ban ai snam sngewbha bad kila don haduh 14 ngut ki longkmie kiba la leh test ïalade lyngba ka breast screening machine bad 15 ngut kiba la wan ban leh ICTC test na ka bynta ka HIV and AIDS bad kiwei kiwei.
“Ka jingwan ka jong nga sha WKHD kam da dei eh tangba ngan shu pyndep ïa ka kamram ban pynher ïa ka lama lai rong jong ka Ri ha ka jingrakhe sngi laitluid ka Ri ka ban long lashai ka sngi ka 15 tarik u Nailar hynrei ka jingwan ka jong nga ka dei ban don da ka jingmut kaba jylliew bad ngin wan sha phi ha ryngkat ki jingseisoh,” ong ka Myntri haba kren ha kane ka sngi.
Kala ïathuh ruh ba naduh mynstep jong ka 14 tarik u Nailar ka la pynlut ïa ka por ban leit peit ïa kiba bun ki jaka hapoh ka thaiñ Mawthadraishan bad ïoh ruh ban plie paidbah haduh 3 tylli ki health sub centre kynthup kawei hapoh West Khasi Hills District kaba don hapoh ka shnong Sohparu.
Shuh shuh kala ong ruh ba na ka liang jong ka tnat kala leh ïa katei ka Integrated Health Camp kaba la lah ban ai jingmyntoi ïa ki paidbah ha kaba kila don shibun ki jingleh test ïa ki jingpang bapher bapher bad ki paidbah ki lah ban sngewthuh ïa ka koit ka khiah jong lade khamtam da ka jinglah ban wanrah ïa ka breast cancer screening machine na ka bynta ki longkmie nalor kiwei kiwei.
Ka Myntri ka la kdew ruh ba ha kane ka Health Camp la wanrah ruh ïa u psychiatrist uba la buh kyrpang ban ïakren bad ki longïing kiba don ïa ki khun kiba don ha ka jingartatien bad jingeh ha ka jingmut jingpyrkhat na ka daw jong u drok.
Ka la ai ka jingkhublei ruh ïa ki 9 ngut kiba la ai sngewbha ïa ka snam bad ïa ka kynhun kaba wanrah ïa ka machine ban test ïa ka jingpang breast cancer ha kaba 14 ngut ki kynthei ki la leit ban phah test ïalade.
Ha katei ka sngi la ïoh ruh ban test ïa ka jingpang TB, ka ICTC test na ka bynta ka HIV/AIDS ha kaba 15 ngut ki briew ki la leit test bad na ka liang ka Kong Ampareen ka la pyntip ruh ba haduh mynta ki la don haduh 228 ngut kiba la shah ktah ha ka jingpang HIV/AIDS ha ka West Khasi Hills District, bad bun kiba ïoh ïa kane ka jingpang lyngba ka kam shongkha khleh (sexually transmitted) khlem pyrkhat.
Ka la kyntu jur ïa ki samla bad ki khynnah skul ba kin sumar bha ïa la ka jong ka met bad ban ym ailad ïano ïano ban ktah ne leh sniew ïa ki ha kaba kala bynrap ban ong ba “Ai ba ka met jong phi kan long ka temple jong U Blei”.
