Shillong, Nailar 14
Ka ïingbishar Meghalaya High Court kala bthah ïa ka Shillong Municipal Board (SMB) ba kan aiti ïa ka kaiphod halor ka jingdon ki nongshong dukan madan kynthup kito kiba khlem pat don licence ha ki thaiñ Laitumkhrah.
Kane ka hukum ka ïingbishar kala mih haba shong bishar ïa ka aplikeshon bala buh da ka Seng Samla Laitumkhrah “Ieng Skhem Ha Ka Hok”, kaba pan ban bynrap ïa ka kum ka liang mamla ha ka Public Interest Litigation (PIL).
“Ngi bthah ïa ka Shillong Municipal Board ba kan ai ïa ka kaiphod ha kane ka ïingbishar haba ïadei bad ka jingdon ki licence ban shong dukan madan bala ai ban shong dukan madan ha ryngkat bad ka kyrteng jong kiba ïoh licence ha ka thaiñ Laitumkhrah,” ong ka Division Bench ka ïingbishar ba kynthup ïa u Chief Justice IP Mukerji bad Justice W Diengdoh ha ka hukum ba pynmih ha ka sngi Palei.
“La bthah ruh ïa ka Board ba kan leit jurip, pynlong ïa ka jingtohkit bad pynpaw ha ka kaiphod ïa ka kyrteng bad ka jingdon ki nongshong dukan madan kiba die ïa ki mar ki mata khlem ka licence ha ka thaiñ. Ïa kane ka kaiphod dei ban aiti ha kane ka ïingbishar hapoh ka 28 tarik Nailar, 2025,” kala bynrap.
Ka Seng Samla Laitumkhrah kala pynpaw ïa ka jingsngewkhia halor ka jingshong dukan madan ba khlem aiñ bad ba khlem ïoh jingbit da ki nongshong dukan madan ha ka thaiñ Laitumkhrah ha Shillong.
Ka kwah ba ka hukum bala pynmih da kane ka ïingbishar ban pynkhuid ïa ki katto katne ki jaka jong ka Nongbah na ka jingdon ki nongshong dukan madan ba khlem licence, kum ka Khyndailad ban pynïar sha Laitumkhrah da kaba kyndang ïa ki dukan madan ba khlem licence na ki surok bad lynti ïaid kjat ba kin kylluid, khuid, ban shngaiñ ïa ki nongleit nongwan bad ki kali.
Hynrei, ïa kane ka jingkyrpad jong ka Seng Samla la pyrshah da ka nongmudui ka Meghalaya & Greater Shillong Progressive Hawkers and Street Vendors Association (MGSPHSVA) bad u nongïasaid ka Jylla halor ka nongrim ba ka ïingbishar ha kane ka PIL kala shimkhia ïa kane ka jingeh ha baroh ki surok bad lynti ïaid ka Shillong.
Katkum ka jingong u Tangi B Additional Advocate General, ka kam kala dep ban leh da ki bor Sorkar ha ka thaiñ Police Bazaar bad yn sa nang pynïaid ruh sha kiwei ki jaka da ki pali pali. Kam sngew donkam ïa kawei pat ka kynhun ne liang mamla ban pynïadon bynta lang ha kane ka PIL namar ka lah ban nang pynjyrwit jyrwat ïa ka kam.
Ka ïingbishar kan sa shong bishar ïa ka jingkylli kaba mih ban bynrap ïa ka Seng Samla Laitumkhrah kum ka liang mamla ha ka sngi shong bishar ban wan.
