Nongpoh, Nailar 14
Hadien ar sngi ba uwei u samla u la kynthih najrong jong ka jingkieng Byrnihat sha ka wah Umtrew, ïa ka met ka jong u, la lap noh ha ka sngi Palei da uwei u rangbah uba khat shyiap ha ka shnong Morogdula 14 Mer jong ka Kamrup District ka jylla Assam.
Kum ban shu ïathuh biang, utei u samla uba la tip kyrteng kum u Wanphrangsngi Syiemlieh na ka shnong Nongkyndang, Saiden u la leit ban kynthih sha ka wah Umtrew najrong katei ka jingkieng Byrnihat hadien ba ka la mih ka jingïakajia bad la ki paralok ba ïadih drok lang na ka bym hun ïa sam ïa ka pisa kaba mih na ka jingdie ïa kawei ka mobile tuh myn ha ka step jong ka 12 tarik mynta u bnai Nailar.
Naduh katei hi ka sngi kaba utei u samla u la kynthih sha katei ka wah, na ka liang ki pulit ka Search & Rescue Team, ka Fire & Emergency Services (F&ES), ki pulit ka thanad Byrnihat ha ryngkat bad ki bahïing hasem kila pynlong ïa ka jingwad ïa utei u samla, hynrei ki khlem lapdien shuh tad haduh ka sngi Palei.
Hadien ka jingïoh jingtip ïa katei ka jinglap ïa katei ka metïap, la pyntip noh mar mar sha ki bor pulit ka thanad Byrnihat kiba la leit ban shimti ïa katei ka met jong utei u samla kaba la per ha ki sla um da kaba pyndonkam lyngba ki lieng bad pynkit pat sha Civil Hospital Nongpoh na ka bynta ban pyndep ïa ki jingdonkam katkum ki kyndon jong ka aiñ hashwa ba kin aiti pat sha ki bahaïing hasem.
