Jowai, Nailar 14
Ka Mukhla Raij ka la khur jingjop ha ka Super Division Football Tournament (Kelsiroy Pala Memorial), katba ka Thadmynri ka la jop ha ka 2nd Division (Joybell Suiam Memorial Football Tournament) ba la pynïaid da ka Thadlaskeiñ Sports Association (TSA).
Ha ka jingïalehkai 2nd Division kaba la long ha madan Wahïajer Multi Sports Complex ha ka sngi Palei, ka Thadmynri ka la pynliem noh ïa ka Hunlang-i Moobakhon da 3-1 kol. Ïa ki kol jong ka Thadmynri la thep da u Watslem Nongrum (3), Saiñbor Nongrum (48) & (60). Katba na ka Hunlang-i Moobakhon la thep da u Rejoy Shylla (24).
Haba phai sha ka Super Division, ka Mukhla Raij ka la pynliem noh ïa ka Niriang SC da 3-0. Ïa kine thep da u Chandame Suna lyngba ka penalty ha ka minit kaba 16, Davidson Ïawphniaw (46) bad u Balan Mawlong (81).
Ha ka 16 tarik ka jingïalehkai 2nd Division kan long hapdeng ka Mukhla Nongrum pyrshah ïa ka Maia Club Umjlasiaw ha ka por 9 baje mynstep, ka Modop Youth FC ïa ka Nongkhroh Sohbar por 11 baje. Katba ha ka Super Division, ka Grounded ïa ka Mookyndur SC ha ka por 1 baje mynsngi, ka Wahïajer SC ïa ka Nongkhroh Krem Kum por 3 baje nongphai sngi.
