Shillong, Nailar 14
U Symbud Myntri Rangbah ka Jylla uba dei khmih ruh ïa ka tnat District Council Affairs (DCA), u Bah Prestone Tynsong u la ong ba ka Sorkar shen kan sa pyllait noh ïa ka bhah jong ka Garo Hills Autonomous District Council (GHADC) ban pynlah ïa ka ban pynkhuid ïa ka tulop ba dang sahteng jong ki nongtrei jong ka.
“Shen yn sa pyllait noh ïa ka bhah sha GHADC bad ynda la dep ïa kata, nga thikna bha ba kin sa lah ban pynkhuid ïa ka tulop jong ki nongtrei jong ki”, la ong u Bah Tynsong ha ki nongthoh khubor.
Ka GHADC ka la mad ïa ka jingeh ha ka liang ka pisa tyngka, kaba la pynlong ïa ki jingïakhih bad ki jingdawa ban siew ïa ka tulop kaba dang sahteng mynta la 43 bnai.
U Bah Prestone u la ban jur ïa ka jingdonkam ba ka GHADC kan pynmih la ka jong ka pisa, ban ïa kaba shaniah tang ha ki bhah ka Sorkar.
“Nga la kyrpad ïa u Chief Executive Member (CEM) bad Executive Council (EC) ba kin bthah ïa ki nongtrei ba kin long kiba ïaishah bad ban shim ïa ka jingkitkhlieh ban pynmih ïa la ki jong ki jingpynmih pisa,” u la ong haba pynskhem ïa ka jingdonkam ban shaniah ha lade na ka bynta kiwei pat ki Autonomous District Council, kynthup ïa ka KHADC bad JHADC.
Katkum ka jingong u Symbud Myntri Rangbah, ki ADC ki hap ban sngewthuh ba ki don la ka jong ka riti synshar ka ri bad ki don ki kyndon hapoh ka Sixth Schedule ban pynmih khajna.
“Kumta balei phim leh hi dalade ïa ka jingpynmih khajna katkum ki kyndon jong ka khyrnit kaba hynriew. Kata ka long kaba kongsan bha,” u la pynpaw.
