Imphal, Nailar:
Katkum ka jingsakhi na ka jingïai bteng jong ka jingkurup tiar siat ha kylleng ki jaka jong ka jylla Manipur, ki pulit ki la khmih lynti ba ki kam pyntriem kin sa nang duna katba nangmih ki sngi.
Da ka jingïatreilang jong ka kynhun ki shipai pdeng bad ki pulit jong ka Manipur, ki la lap ïa ka jaka buh tiar, ki tiar siat, bad ki jaka buh tiar thma, kynthup ïa ki tiar shipai, ha ki jingpyntreikam pyrshah ïa ki lehnoh, ong ki khubor ba thikna. Ïa kiba bun ki jingkhynra la pynlong haman ki jaka na ka por sha ka por halor ka jingthmu ban lah ban pynduh pyndam ïa ki kam pyntriem jong ki riewkieng atiar ha ka jylla.
Ha ka jingkhynra ba dang shen ka General Area kane ka kynhun ïatreilang ka la ïoh kurup ïa kawei ka suloi Insas kaba heh 5.56 mm bad ka Magazine, kawei ka .22 pistol kaba don 02 tylli ki Magazine, kawei ka suloi Action, kawei ka Projectile Launcher, san tylli ki Improvised Mortars, san tylli ki suloi Pull Mech Rifles, bad 10 tylli ki bom Mortar.
Kane ka kynhun ka la lap ruh ïa ki katto katne ki tiar naduh ka General Area jong u lum Thangjing jong ka shnong Loilamkot haduh ka shnong Nalon kaba hap hapoh Churachandpur-PS, Churachandpur District.
Kitei ki tiar ki kynthup ïa kawei AK-47, kawei ka AK-47 Magazine, kawei ka 12-bore SBBL Gun, kawei ka .303 Rifle ryngkat u Magazine, kawei ka .303 Rifle bad u Magazine, ar tylli ki Rocket (8 phut), lai tylli ki Rocket (5 phut), ar tylli ki Tactical Helmet, ka 12-bore Ammunition Belt, san tylli ki Bulletproof Jacket ba khlem sop plate, u bom kawang kti ba la shna hi, san tylli ki Mortar Bomb ba la shna hi ha ka ri, 4 tylli ki song kuli AK-47, 6 tylli ki synduk AK kiba thylli, 3 tylli ki synduk SLR kiba thylli, ar tylli ki song kuli .303, saw tylli ki synduk .303 bathylli, kawei ka Wireless Set, kawei ka Leather Pouch, 200 gm u duma bad katto katne kiwei pat ki jingpyndonkam ba bun. Ïa ki tiar ba la ïoh kurup la aiti sha ki thanat ba dei peit ban pynlong ïa ka jingtohkit kaba bniah. Ki bor shipai bad ka kynhun pulit jong ka jylla ki la ïai bteng ban pynlong ïa ka jingleit khynra sha kylleng ki jaka bad ki la kyrmen skhem ba kane ka jingpyntreikam jong ki kan long kaba seisoh kumba la thmu.
