Shillong Nailar 14
U Bah Chandame Sungoh Chairman ka Hynñiewtrep Border Dispute Redressal Forum (HBDRF) ula ong ha Lapangap, West Jaintia Hills District ki nongshong shnong ha katei ka shnong ki tieng ban leit sha ki jaka rep namar ki tieng ïa ki Karbi kiba na ka Jylla Assam.
Kane ka jingtieng ban leit ki nongshong shnong sha ki jaka rep kadei hadien ka jingïakajia pud bad ka jylla Assam dang ha kine ki khyndait bnai ba ladep.
U la ïathuh ba katkum ka jingïoh jingtip jong u, ki pulit kiba la buh ha Lapangap ruh ki khlem ïoh ka bor ban ïada ïa la ki nongshong shnong ban leit sha ka jaka ba don ka jingïakajia pud.
Ula ong ba imat ka Sorkar Meghalaya ka bthah ïa ki pulit ban shong tang ha shnong Lapangap bad ym shem la aibor pat ban ai ka jingïada ïa ki nongrep bad ki kylla sohpdung jong ka synshar paidbah.
“Ka riti synshar jong ka ri India ka ai ïa ka hok longbriew man briew khamtam kiba dei ki riewlum. Ki nongshong shnong kim don jingshaniah ha ka sorkar namar ba kam lah ban pynsangeh ïa ka jingwan thombor bad ki jingshna beaiñ da ka Assam” la ong u Bah Sungoh.
Ula ong ruh ba ka paw ba Sorkar Jylla ka pyndem tdong ïa ka sorkar Assam namar ba kam shem la lah ban leh eiei pyrshah ïa ki briew na Jylla Assam ba wan thombor ïa ki jaka rep jong ki nongshong shnong ka Lapangap bad kam shem la lah ban pynsangeh ïa ka jingkyntur pud ki nong Assam.
“U Symbud Myntri Rangbah u Bah Sñiawbhalang Dhar ula kular ban nangphah shuh shuh shuh ki pulit sha Lapangap ban long ka jingshngaiñ ïa ki nongshong shnong hynrei haduh mynta ruh khlem phah. Kito ki pulit ba ladon lypa ruh kim shem la leit sha ki jaka rep ki nong Lapangap namar ba kim shem ïoh bor na ka Sorkar” la bynrap shuh shuh u Bah Sungoh.
U Bah Sungoh u la pynpaw ruh ka jingsngewsih halor ka jingthmu sieh lama ïong ha ka sngi laitluid ka ri India hynrei u la ong ba kum ki nongshong shnong ba im ha ka ri synshar paidbah kim ïoh pat ïa kata ka hok synshar paidbah.
