Jerusalem, Nailar:
Ki kmie jong ki nongshah rahbor jong ki nong Israel kiba la shah bat ha Gaza, kynthup ïa uwei uba la iohi ba u la ring- raikhoh bha, ha kawei ka video ba la pyllait da ka Hamas kaba dang shen, ki la pynpaw ïa ka jingsheptieng kaba jur ha ka Sngi Ba-ar ba ka jingthmu ban hiar thma jong ka Israel ka lah ban buh jingma shuh shuh ïa ka jingim jong ki khun shynrang jongki namar ka jingma jong ka jingpynshitom beiñ kitei ki lehnoh ka Palestine.
Namar la ong ba ka Israel ka la thmu ban leit hiar thma tyngeh biang ia ka Hamas hapoh Gaza, kaba la shah kynthoh bha ban shimti ïa ka nongbah Gaza ha ka thma kaba la jan neh ar snem pyrshah ïa ka kynhun lehnoh jong ka Palestine ka Hamas.
“Haba nga iohsngew ba ka sorkar jong ngi ka thmu ban pynjlan ia ka thma ha Gaza, nga kum ka kmie nga tieng, namar ngi tip ba ka Hamas ka ai hukum…ban pyniap ia ki nongshah rahbor ha kano kano ka por ba (ki shipai jong ngi) ki nang jan sha ki,” la ong ka Viki Cohen, ka kmie jong u Nimrod Cohen, u shipai Israel uba la shah kem ha ka por ka jingleit hiar thma jong ka Hamas ia ka Israel ha u snem 2023.
Ka Cohen, kaba don hapoh Geneva ryngkat bad kiwei pat ki kmie jong ki nongshah rahbor, ban ujor sha ka International Committee jong ka Red Cross, ba kan iarap ia ki, ha ka jaka jong kata, ka la dawa ia ka Israel ba kan leh shitom ban wanrah ia ka jingiateh ban ioh ban pyllait noh ia ki.
Ka jingduna bam bad ka jingiap namar ka jingkyrduh bam, ka la nang jur hapoh katei ka nongbah Gaza, ong ki kynhun ai jingiarap, hapdeng ki jingkhang jong ka Israel, ia ki jingiarap. Ka Israel, ka kyntait ia ka jingkitkhlieh, kaba pynsaphriang ia ka jingkyrduh bam ha Gaza, da kaba kynnoh ba ka Hamas, ka la tuh ia ki jingiarap, kaba ka Hamas, ka kyntait.
Na ki 251 ngut ki nongshah rahbor ba tynrai kiba la shah kem ha ka Hamas, kumba 50 ngut ki nongshah rahbor ki dang sah ha Gaza, ha kaba la shu antad ba kumba 20 ngut kiba dang sah ha ka kti jong ka Hamas, ki dei kiba dang im tad haduh kine ki sngi.
