Shillong, Nailar 17
Ka Khasi Students’ Union (KSU) South East Central Circle bad ka Federation of Khasi Jaiñtia & Garo People (FKJGP) Riwar Circle, kila mih shakhmat ha ka sngi Saitjaiñ ban pynïeng ïa ki radium retro reflective tape ha shi lynter ka rud surok na Laitlyngkot haduh Mawlieh kaba hap hapoh ka package 2.
Kine ki ar seng hapoh ka jingïalam u Vice President ka KSU, SECC Bansuklang Khongwar bad President ka FKJGP Riwar Circle Evanfield Khonglam, kila shim ïa kane ka sienjam haba ïohi ïa ka jingkynnoh kheiñ sting bad leh bym suidñiew ka kompani ïa ka jinglong shngaiñ bad ka jingsuk ka ïaid ka ïeng ki paidbah na kane ka surok.
“Ka KSU bad FKJGP ki la ïakren la bunsien bad ki bor ba dei khmih na ka Sorkar bad kumjuh ruh ka kompani kaba pyntrei ïa ka surok Shillong-Dawki hynrei man ki sien, ki shu kohnguh tang ka khlieh bad kim pyni dak satia katkum ka jingïakren,” ong ki nongïalam jong ka KSU bad FKJGP.
Namar kata, ki la ong ba kim banse ban shim halade ïa ka kam ban leit thung ïa la ki jong ki radium na ka bynta ka jingshngaiñ bad ka jingsuk ki nongleit nongwan ha ka thaiñ Pynursla Sub Division.
Kine ki ar seng kila maham ruh ïa ka kompani kaba pyntrei ïa ka surok bad ïa ka surok ba ki dei katba lah ban pynbeit pynbiang ïa ka jinglong shngaiñ ka surok khamtam eh ba kin peit bniah ïa ka jingshngaiñ u paidbah la ka long ha ka bynta ka jingtwa khyndew ne ha ka bynta ka jinglong jingman ki rud bad ki kner surok.
“Lada kim shimkhia, ka KSU bad FKJGP kin sa shim da kawei pat ka lynti kaba kham tyngeh pyrshah ïa ka kompani ne ïa ka Sorkar,” ki la ong.
