Shillong, Nailar 17
Ka Shillong Lajong FC sa shisien pat kan hap ban ïatynjuh bor biang bad ka NorthEast United FC ha ka semi final jong ka lympung ïalehkai 134th Durand Cup ka ban long ha ka 19 tarik mynta u bnai ha ka por 7 baje jnmiet ha Jawaharlal Nehru Stadium, Polo.
Ka jingïakynduh biang kine ki ar tylli ki kynhun ïalehkai ka la wan hadien ba ki la khur jingjop ha ka quarter final kaba la long ha ka sngi Saitjaiñ ha Shillong bad Kokrajhar.
Ha katei ka jingïakhun quarter final ha Shillong, ka Shillong Lajong ka la pynliem noh ïa ka Indian Navy FT da 2-1 kol, katba ka NorthEast United FC ka la jop da 4-0 kol ïa ka Bodoland FC ha Kokrajhar.
Kine ki kynhun ki la ïakynduh teng ha ka jingïalehkai jong ka Group-E ha kaba ka NorthEast United ka la jop da 2-1 kol.
Haba phai sha ki jingïakhun quarter final ha ka sngi U Blei, ka Jamshedpur FC ka la shah rem noh da 0-2 kol ha ka kynhun ïalehkai I-League ka Diamond Harbour FC ha JRD Tata Sports Complex. Kane ka la wan urlong lyngba ki ar kol ba la thep da u rangïalehkai ‘dien u Sairuatkima uba la thep ha ka minit kaba 3 bad u 41.
Ka jingshah rem katei ka kynhun ïalehkai Indian Super League ka la long hadien ka jingmih noh u coach ba kynsai jong ka, u Khalid Jamir uba la shimti mynta kum u coach ka kynhun ialehkai ka ri India. Te kumta ïa ka Jamshedpur la shimti shipor da u Steven Dias.
Ha kawei pat ka jingïa-khun, ka East Bengal ka la pynliem noh ïa ka Mohun Bagan Super Giant da 2-1 kol ha Vivekananda Yuba BharatiKrirangan (VYBK).
Ha ka kylla step ka East Bengal ka la pynkhih jar nyngkong eh lyngba ka penalty ba la shut da u Dimitrios Diamantakos bad kane ka la wan hadien ba u Bipin Singh u la shah pynur hapoh ‘box’ ha u rangïalehkai ‘dien ka Mohun Bagan.
Hadien katto katne por ba la bteng ïa ka jingïakhun jong ka kylla miet u Diamantakos u la pynbud ïa ka kol kaba ar ha ka minit kaba 52 hadien ba u la ïoh ban shut ïa ka bol bad ka la leit dei na ka kjat u rangïalehkai ‘dien ka Mohun Bagan ha kaba u rangapkol um shym la lah ban khanglad na ka jingshah thep.
Ka Mohun Bagan kaba la rung final ha u snem ba la lah, ka la pyrshang ban ïakhun tyngeh bad dei ha ka minit kaba 68 ba ka la lah ban pynphai kylla shi kol lyngba u Anirudh Thapa. Hynrei haduh kaba kut kam shym la lah shuh ban pynphai bad ka la mad ïa ka jingshah rem.
Te kumta ka East Bengal kan ïakynduh semi final pyrshah ïa ka Diamond Harbour ha ka 20 tarik ha Kolkata.
