Shillong Nailar 17
Ka jaka paidbah kaba don ha shilynter ka lynti ïaid kjat ka surok ha Khyndai Lad (Police Bazar), kaba dei ka lynti ba ju shong ki nongdie madan bad kaba ju sawa da ki sur ba shyrkhei jong ki nongdie jingdie madan ha katei ka jaka, mynta pat kala kylla long ka jaka ïa rwai ïatem kaba la ai kyrteng ‘Lynti Sur Bathiang’, kaba mut ‘Ka Lynti jong ki Sur Baitynnad’.
Ka jingthmu kalong ban pynkylla ïa ka jaka sor ha Khyndai Lad, kum kawei na ki jaka ba pawnam tam ha Shillong.
Ka jaka ha Khyndai Lad mynta kala kylla long ka jaka ïa rwai kaba dap da ki jingshad, ki jingpynphuh pynphieng bad kiwei kiwei de.
“Da ka jingïatreilang bad ka Meghalaya Grassroots Music Project ryngkat bad ka jingkyrshan jong ka tnad jngohkai pyrthei, kane ka jingïatreilang ka pynpaw ba kumno ban pynwandur ïa ka sor, ka polisi kolshor bad ka jingpynroi ïa ka kam jngohkai pyrthei-ki lah ban ïaid ryngkat”.
Kane ka jingsdang ban ïatem ha Khyndai Lad kadei hadien ba na ka liang ka sorkar kala lah ban pynkohnguh ïa ki nongdie madan ban kynriah noh na katei ka jaka sha jaka ïeng kali ha MUDA, ka jaka bala shna kyrpang da ka sorkar.
Kane ka jingïatem ïaput ha lynti ïaid kjat ha Khyndai Lad kala sdang ha ka 14 tarik u Nailar 2025, kaba dei ka sngi laitluid jong ka ri India. Hashwa ka 14 tarik kala don ka jingïarwai ha katei ka jaka ba la shna kyrpang da ka sorkar kaba la pynlong ha kapor janmiet.
Ia katei ka jingrwai bala tip kum ka ‘Lynti Sur Bathiang’ la plie paidbah hi da u Myntri Rangbah ka Jylla u Conrad K Sangma ha ryngkat ka jingïadonlang ruh u Myntri ba khmih ïa ka kam jngohkai pyrthei u Bah Paul Lyngdoh.
La sakhi ruh ba ha katei ka sngi bala sdang ïa ka jingrwai jingput ha Khyndai Lad ki paidbah na kylleng ki jaka basah ha Shillong kila wan ban tuid ha katei ka jaka, ban ïashad ïa lehkmen ruh kumjuh.
Dangshen na ka liang u Myntri Rangbah ka Jylla ula ong ba ngi la ju thrang ban shna ïa kane ka surok, bad kyrmen ba bun kiwei pat ki surok, ym tang ha Shillong, hynrei ha kiwei pat ki bynta jong kane ka Jylla kaba itynnad jong ngi, ha kaba ngi don ïa ki jingrwai bala pynsawa da ki samla jong ngi bad thaw lad na ka bynta jong ki, bad ban ailad ïa ki nongjngohkai pyrthei bad ki nongshong shnong, ban sngewtynnad ïakata ka jingrwai.
U Myntri Rangbah ula kyntu ïa ki briew ban ïatreilang bad ka bor synshar district.
“Ka jingpynkylla dur ïa ka jaka kaba la ïohi ha ka sngi Thohdieng, ha ka sngi shuwa jong ka sngi laitluid, namar ba ïa ka lynti la pyndap da ka rong lai rong, da ka jingtap jong ka rong saffron, lieh bad saw. Ki dukan bad ki nongdie jingdie ha surok kila ïasohlang, da kaba pynitynnad ïa ki jaka jong ki da ki lama”.
